Chanchin thar thenkhat :

Keifang kum 100 tlinna lawm

Keifang khua kum 100 tlin lawmna pui ber leh a kharna hun nimin-a neih chu Chief Minister Zoramthanga chuan a hmanpui a. Keifang khaw mipuite chu an kum za tlin a lawmpui thu sawiin, Keifang khua chu kawngpui pawimawh intawhkhawmna khua, la thang chauh tur a nih thu a sawi a. Khaw mipuite pawhin thahnem ngaia hmasawnna ruhrel dinna tur an lo sawipui te pawh a remchan dan anga a lo ngaihtuahpui zel tur thu a sawi bawk. Keifang khua Centenary lawmna hi Centenary Sports Complex-ah neih niin, December ni 13 atang khan a lawmna neih tan a ni. Chief Minister hian ‘Sangtea Memorial Centenary Basketball & Volleyball Court’ chu a hawn bakah Saitual DC Complex sak hna thawh mek chu a hmunah tlawhin a enfiah nghal bawk.

Supply Minister in hmanpui

Mizoram Consumers’ Union (MCU) Hqrs. in nimin-a Horticulture Conference Hall, Aizawl-a Annual General Meeting an neih chu Supply Minister K. Lalrinliana chuan khuallian niin a hmanpui a, Consumer te dikna humhimtu FCS&CA Department a awm tih hre thar leh tura mipuite chu chahin, lungawilohna nei chuan Legal Metrology-ah complain thehluh theih a ni tih a sawi a. Legal Metrology tihchangtlun nan hma an la zel tih pawh sawiin, hmanrua pawh lakkhawm zel a nih thu leh, District thar pathum-ah Office din tum niin Hnahthial-ah Ofice sak zawh a ni tawh thu leh Khawzawl leh Saitual-a Office sakna tur sum pawh an neih tawh thu a sawi bawk.

MYC in result puang ta

Mizo thalai ten tualchhunga IAS Coaching man man zawka an kal theihna tura Mizoram Youth Commission (MYC) in tun thla ni 11-a ‘IAS Hybrid Coaching Scholarship Exam’ an buatsaih a titha mi 100 te chu nimin khan puan a ni a, he Mega Scholarship programme atana mi 100 (Aizawl-60, Lunglei-20, Siaha-10, Kolasib-10) thlanchhuahte chu an Centre-ah theuh zirtirna pek an ni dawn a ni.

ZPM in Office kharna nei

ZPM Party chuan kumin atana Aizawl-a an Party Office kharna hun nimin khan hmangin kum-thar January 10-ahan Office hi an hawng leh dawn a ni. MNF Party te chuan niminpiah khan Office kharna hun an lo hmang tawh bawk a ni.

BJP Party in hun hmang

BJP Mizoram Pradesh chuan nimin khan Aizawl-a an Office-ah Advance Christmas an hman bakah Good Governance Day pualin hun an hmang a, an President Vanlalhmuaka chuan thu sawiin tunhnaia a zin report a pe bawk.