Aizawl leh Serchhip-a FEMSE Member ten Joint Meeting neiin lungrual taka hmalak an rel

Federation of Mizoram Samagra Shiksha (FEMSE) Hqrs. hruaitute chuan nimin khan Serchhip rawn tlawhin FEMSE Sub-Hqrs. Serchhip hruaitute nen inkawmna an nei.

He inkawmna BRC Hall, Serchhip-a neih ah hian FEMSE Hqrs. President R. Lalnunhlima chuan FEMSE member ten harsatna an tawh te sawiin, nikum sawrkar kum (2020-2021) atana sawrkar laipui atanga an tana sum rawn kal 2nd instalment, kumin kumtir lama State sawrkar in a dawn tawh chu sawrkar in inkaihhruaina a siam ah ni 21 chhunga pekchhuah tur a nih laiin tun thlengin pekchhuah an la ni lo tih a sawi a, hei vang hian tun sawrkar kum atana 1st instalment pawh dil theih ala nih loh phah thu a sawi. Hei bakah hian an dinhmun siamthatna tura hma an lakna ah Study Group ten nikum November 27-a recommendation an thehluh chuan tunah hian kum khat a tlin tawh thu sawiin, amaherawh chu tun thlenga a la hlawhtlin loh avangin an la bawhzui zel thu a sawi a. He recommendation hi tih hlawhtlin a nih chuan an dinhmun pawh ziaawm ve thei tura an beisei thu sawiin, he recommendation hi la hrechiang tawklo te an awm theih avang leh a huho a hmalakna te an neih theihna turin hetiang inhmuhkhawmna hi an neih thu a sawi bawk.

He Meeting-ah hian Study Team-te sawrkara Recommendation a thehluh te zirho niin Recommendation-ah hian Samagra hnuaia thawkte hlawh tihsan dan tur leh Service tha zawk an neih theihna tur ruahmanna te siam a ni a, Samagra hnuaia thawkte hamthatna tura rawtna thlente chu tha ti tlangin, a rang thei ang bera a hlawhtlin ngei theih nana theihtawp chhuah tlan zel a, rualkhai taka FEMSE Gen. Hqrs. leh Sub-Hqrs. te pawh tha thawh zel tha an ti bawk a ni. Hei bakah hian he Meeting hian Resolution siamin siamin, ‘Samagra Study Group Recommendation a hlawhtlin theih nan Serchhip District huamchhunga Minister/MLA te chu hun remchang hmasa berah FEMSE Sub-Hqrs Serchhip hminga hmuh ni se kan ti’ an ti bawk.

Mizoram-ah SSA leh RMSA kalpui a nih hnu khan State Project Director (SPD) hrang hnuaia awm an nih avangin SSA leh RMSA hnuaia thawktu hrang hrangte chuan pawl an din hlawm a, amaherawh chu SSA leh RMSA te Samagra Shiksha-a chhunkhawm a nih hnuah heng pawl hrang hrangte hian pawl pakhat a inchhunkhawm relin kum 2019 kumtir lam khan pawl 8 te chuan 'Federation of Mizoram Samagra Shiksha' (FEMSE) hi an din ta a ni.

Nimin-a he inhmuhkhawmna hi FEMSA Serchhip Sub-Hqrs. President H. Lalramsanga chuan kaihruaiin FEMSE Serchhip Sub-Hqrs. Secretary Lalthlamuana Ralte chuan an pawl dinhmun leh hmalakna te a tarlang a, FEMSE Hqrs. Aizawl atangin General Secretary Lalbiaknunga pawhin an hmalakna te a tarlang ve bawk a ni.