Serchhip District Consumers Meet leh Minister's Proficiency Award lawmna neih a ni

Serchhip District Consumers Association ten kumin-a ‘Minister's Proficiency Award’ an dawn lawmna leh Serchhip District Consumers Meet chu nimin khan Serchhip DC Conference Hall-ah neih a ni.

Nimin-a he hun hman hi Mizoram sawrkar-a Supply Department Secretary Zothanmawia chuan khuallian nia rawn hmanpuiin Consumer ten an dikna chanvo an humhalh theihna turin mimal a hmalak remchang lo tam tak awm thin mahse pawl anga hmalak chu a awlsam phah a, Consumer ten an dikna chanvo an chan theihna turin Consumer Association chu pawl pawimawh tak a ni, a ti a, Consumer Association hrauitute chuan kawng tam takah mi thenkhat lawmloh pawh an hlawh rualin an hnathawh erawh chhuanawm a tih thu a sawi a. Mi sawiselna pawh dawn lova hmun hrang hranga Consumer Association leh Branch hrang hrang a ding chuan hmasawnna tam tak a thlen thu a sawi bawk. Mipuiten an chanvo dik tak an chan theihna tur chuan kan dikna leh chanvo te kan hriat ve a tul thu a sawi bawk.

Serchhip District Consumers Association (SDCA) President H. Zonuntluanga kaihhruai he hunah hian khualzahawm FCS&CA Department Director Ramdinliani chuan SDCA chu Mizoram-a Consumers Association active ber, Consumers Association dangte pawhin an entawn nia a hriat thu sawiin, hei hi kumin a Minister's Proficiency Award an dawn hian chiang takin a tarlang nia a hriat thu a sawi a. Mipuite chu Consumer vek kan ni tih sawiin, hei vang hian Dan hnuaia kan dikna leh chanvo kan hriatchian a tul thu a sawi a, chu mai bakah kan dikna leh chanvo chhuhsak kan niha hmalak dan tur kan hriat a pawimawh thu leh Chu mai bakah zualkona tura kan zualko ngam a tul thu a sawi bawk.

He hunah hian SDCA Secretary Laldinpuia chuan he hun an hman chhan leh an hmalakna te tarlangin, kumin March 15 khan Supply Minister hnen atangin Serchhip District Consumers Association ten Mizoram-a Consumers Association hma la tha lawmman, Minister's Proficiency Award an dawn thu sawiin, hei hian thuziak leh Rs. 10,000/- a kentel thu a sawi a. Hemi lawmna atan leh Consumers Association te intawhkhawmna atan he hun hi buatsaih a nih thu an sawi a. An hmalakna hrang hrang zingah Serchhip-a Khawnvartui sem tur tih chingpen nia hriat chungchang an chhuizuina te, bukna leh tehna dik hman a nih theih nana hma an lak thu te, Mobile Phone Signal thatna turin Service Provider te an kawm thu te, Mipui ten Gas buk tling ngei an lak theihna tura hma an lak thu te, P&E Department in hri leng avanga Meter Reading nei lova bill an siam chungchang ah hma an lak thu te, mirethei ten a thlawna Gas connection an neih theihna turah Serchhip District quota 16 chu 47-a tipung tura hma an lak thu te leh khaw hrang hrangah Awareness Campaign an buatsaih thu te a tarlang a ni.