Chanchin thar thenkhat :

Chanchin thar thenkhat :
(24th Dec., 2021)

Eirawngbawlna Gas-ah hriattirna tichhuak :

Food Civil Supplies & Consumer Affairs Department Director chuan Gas Distributor te leh Consumer ten an zawm tur atan hriattirna a tichhuak. Marketing Discipline Guidelines, 2018 for LPG Distributorship in a tarlan ang leh Food, Civil Supplies & Consumer Affairs Department leh LPG Distributor ten April 21, 2014-a an lo rel tawh anga hriattirna a tihchhuah ah hian Distributor ten a semna tur Point ruata Gas an sem dawn reng rengin, Bukna (digital weighing scale) an keng in an hmang ngei tur a ni tih a tarlang a, Vengchhung-a Gas sem tur reng reng leh Home delivery tur pawh, buk tling ngei consumer ten an dawng tur a ni, a ti.

Gas bur khat hi Kg. 14.2 a tling tur a nih thu leh Legal Metrology (packaged commodities) Rules 2011 in a bituk angin 10 grams aiin a tlem emaw, a tam tur a ni lo tih tarlangin, Distributor ten an Gas sem buk a tlinglo a nih chuan, a tlinlohna zat man consumer-te hnenah an pe tur a ni, a ti a. Gas latu ten Distributor hnen atangin Cash Memo an la thin tur a nih thu leh Consumer ten Gas chungchanga harsatna emaw, zawhfiah ngai an neih reng rengin Distributor ten tha taka lo dawngsawngin an hriat-thiam lohte an lo hrilhfiah thin tur a ni tih a tarlang bawk.


Hnahthial-ah DC hovin sawihona nei :

Hnahthial-ah nimin khan District Bawrh-sap R. Lalremsanga hovin a Office Chamber-ah Hnahthial District chhunga dan leh thupek ken-kawh chungchang sawihona hun hman a ni. He hunah hian District Bawrhsap R. Lalremsanga chuan Dan leh thupek chungchanga hmalakna ah Hnahthial District chhungah harsatna a awm an hriat loh thu sawin, “Krismas leh kumthar hi Mizo Kristian te hunpui pawimawh tak a ni a, kan District mipui ten hlim leh thlamuang taka kan hman ka beiseiin rilru zau tak kan put tlan pawh a ngai a ni,” a ti . Talaite pawhin midangte tana harsatna siam lovin an mahni zawnah hlim takin hmang sela, duty-te pawhin hriatthiamna tam tak neih a tul a ni, tiin “Harsatna te hi kan inrinlawk loh laia lo thleng thut thin a nih avangin kan inrin reng a tul a, chutiang harsatna thleng a awm chuan a rang thei ang berin Magistrate leh Police-te hrilh hriat thin a tha hle a ni,” tiin NGO hruaitute chu thu lai la thiam tura beisei an nih thu a sawi bawk.


Thenzawl-ah YMA in hnathawh enfiah :

Vantawng Group YMA hnuaia Vigilance & Monitoring Committee chuan nimin khan Thenzawl Lothazawl-a Pavillion sak mek chu a hmunah an tlawh a, tun dinhmun ah hnathawh a thain an thawk chak a, an hmanraw hman pawh a tha hle nia an hriat thu an sawi.

Larsap leh CM in Krismas chibai buk :

Mizoram Larsap Hari Babu Kambham-pati leh Chief Minister Zoramthanga te chuan Krismas lo thleng turah Mizoram mipuite chibai bukin hlim taka hmang turin duhsakna an hlan. Larsap chuan Krismas ni-ah hian remna leh muanna hi thupui bera neihin  midangte te nen inngaidamtawn a thlamuang taka len za tum turin Mizoram mipuite a chah a. Isua zirtirna anga inpumkhatna leh inunaunate vawnghim a Mizoram chhunga cheng hnam peng hrang hrang leh Sakhaw hrang hrang vuantute inunauna a pawimawh a ni, a ti a. State chhung hmun hrang hrang a fankual tawhna leh khua leh tuite nen an inbiaknaah mipui an hawihawm a, an inlungrual hle tih a hmuh thu sawiin, “Tun aia kan tan mar lehzual chuan kan theihna sang tak hian hlawhtlinna lian zawk min thlen dawnin ka hria a ni,” a ti. 

Chief Minister Zoramthanga pawhin hri leng avanga Krismas leh Kumthar lawmna pawh duh anga hman leh theih a ni dawn lo chu pawi a tih thu a sawi a. He hri leng hian hmasawnna hna tam ber pawh nasa taka nghawngin a chawl deuh thup a ni, a ti a. Biak In-ah inkhawm theih tawh mahse zaiho a la him loh thu sawiin, Pathian faka hlim taka zai theih hun a la her chhuah thuai a beisei thu a sawi a. Mipuite chu Krismas leh kumthar hlim leh dam taka hmang turin duhsakna a hlan a ni.

Home Minister Lalchamliana pawhin mipui zawng zawng te Krismas leh Kumthar lo thleng tur atan chibai bukin sawrkar in khapna thupek a siam te zawm turin mipuite thlawpna a ngen bawk.


KRISMAS KUMTHAR VUAK VETA COVID-19 TEST KALPUI DAN TUR

I. RT-PCR Sample Collection :

December ni 23, 2021 thleng sample lak a ni ang a, December ni 24, 25 leh 26 an awl ang. December ni 27 - 30 inkarah lak leh a ni ang.

December ni 31, 2021 leh January ni, 2022 an awl ang a, January ni 2, 2022 atangin a pangngaiin lak chhunzawm leh tan a ni ang.

II. Kiosk a RAgT test :

December ni 24, 2021 chawhma thleng sample test theih a ni ang a, December ni 27 atanga ni 31, 2021 chawhma thleng an test leh ang a, January ni 1 leh 2, 2022 an awl anga, January ni 3, 2022 atangin a pangngaiin kal chhunzawm leh a ni ang

III. Emergency bikah :

Mahni veng LLTF /VLTF te hriattir tur a ni ang.

Comments

Popular posts from this blog

Volleyball S/F khel dawn