MZP Hqrs. Serchhip in kumin a HSLC leh HSSLC Exam-a zirlai tithate an chawimawi

Mizo Zirlai Pawl (MZP) Hqrs. Serchhip chuan kumin a pawl 10, High School Leaving Certificate (HSLC) leh pawl 12, Higher Secondary School Leaving Certificate (HSSLC) Exam-a Serchhip District-a zirlai tithate chawimawina hun an hmang.

Serchhip Hmar Veng YMA Hall a he hun hman hi Serchhip bialtu MLA Lalduhoma chuan khuallian nia hmanpuiin MZP chu kawng hrang hrangah ram tan hmahruaitu an ni thin tih a sawi a, Zofate inpumkhatna atana thawh hlawk ber an ni tih sawiin, Zirlaite fuihphura chawimawina chang an hria chu fakawm a tih thu leh Zirlai chawimawina dawng te chuan an nu leh pa, an Veng, an khua leh an bial an chawimawi thu a sawi a. Serchhip bial chuan Mizoram-ah a ber nihna hrang hrang kan hauh mek tih pawh sawiin, “Eng kawngah pawh bial dang entawn tlak nih i tum zel ang u,” a ti a. Resource zawng zawnga pawimawh ber Human Resource Development chu ngaihpawimawh a tul thu leh chumi atan chuan kan Education System pawh kan ennawn a tul takzet tawh thu a sawi a. Vawiin a zirlaite hian mi aia chungnung nih tumin tan kan la vek a, kan hlawhchham a nih pawh in mi pangngai nih tum theuh i la, mi pangngai tih ang kan tih loh thin avangin thalai tam takin a hunlo ah nunna kan chan fo chu pawi a tih thu sawiin, ram leh hnam tana mi tangkai ni theuh turin zirlai te a fuih a ni.

MZP Hqrs. Serchhip Vice President Lalmalsawma kaihhruai he hunah hian khualzahawm MZP General Hqrs. President Lalnunmawia Pautu pawhin tun hun kan thlen theih chhan kan nu leh pa te zah thiam a, mi tam takin chhiatpui nana an hman Social Media chu kan zirna atana min puitu atan chauh hmang thiam a, ram dang leh hnamdang milar te ngaihsan chintawk hria a, ram leh hnam tana an thiamna te hmang thei tura taihmak chhuah theuh turin he huna tel zirlaite a fuih a, chu chu MZP ten zirlaite an chawimawi chhan a ni bawk tih sawiin, Ram tan thil enge ka tih theih ve tih inzawt a, an rilru a vawng reng turin a chah bawk.

Nimin a MZP Hqrs. Serchhip in zirlai tithate chawimawina hun an buatsaih ah hian kumin-a HSLC Distinction a pass mi 37, HSSLC Distinction mi 3 bakah HSLC leh HSLC Top 10 a lang mi 3, an vaiin mi 43 te hnenah chawimawina thuziak hlan an ni a. MZP Hqrs. Serchhip a Secretary Laltlanmawia chuan report a pek bakah an President H. Lallawmkima pawhin thu a sawi bawk a ni.

Comments

Popular posts from this blog

Volleyball S/F khel dawn