Serchhip thuthar thenkhat :

(December 20, 2021)

MJA ten Member thar an lawmlut

MJA Serchhip District chuan Inrinni kalta, December 18, 2021 khan Advance Krismas hmangin Serchhip District atanga MJA Member atana lak thar PC. Lalremsanga (Ramlai Post, Thenzawl) chu MJA Member-ah lawmluhna hun an hmang a, he hunah hian Krismas puala mi harsa te tanpuina turin an member ten sum leh pai an thawhkhawm bawk a ni.

Bazar-a Sa bukna enfiah

Serchhip-a Legal Metrology Enforcement Staff te hmalakna in Inrinni zing khan Serchhip Bazar-a Sa zuartute bukna hman chu enfiah niin, Sa zuartute Sa bun chu buk nawn leh a ni a, hetah hian Vawksa zuar pakhat chu a buk dik tawkloh avangin Section 30 of Legal Metrology Act, 2009 (underwieght) hmanga man a ni a, bukna an hman a khaina nghet la siam lo te pawh siam turin an ti bawk.

Deputy Speaker in Puanthui zirna hawng

  Tuikum bialtu MLA leh Assembly Deputy Speaker Er. Lalrinawma chuan December 18, 2021 khan a bial chhung Chhuanthar Tlangnuam-a Branch MHIP In-ah MHIP te buatsaih Puanthui Zirna a hawng a, Puanthui zina hi bialtu MLA Er. Lalrinawma’n puanthuina khawl panga (5) a pek hmanga MHIP In in an kalpui niin thla thum chhung zel zir tur a ni a, tunah hian mi 11 in an zir mek a ni.

District Wrestling Championship neih a ni

Serchhip District Wrestling Championship chu Inrinni khan Serchhip Chhim Veng-a Lalpuithanga Hall-ah neih a ni a, E. Lungdar atangin players 2, Thenzawl Wrestling Club atangin players 10 leh Serchhip Wrestling Club atangin players 15, an vaiin players 27 an tel a ni. Tun tumah hian Mipa weight category  4 leh Hmeichhia weight category 3-ah inelna neih a ni a, Serchhip Wrestling Club chu Team champion niin Lalruatsanga (Serchhip) chu Best Wrestler atan thlan a ni bawk.

Cricket Tournament-ah BSF an champion

Serchhip District Cricket Association (SDCA) buatsaih ‘Lalrinthangi (Marini) Memorial Cricket Tournament-2021’ chu Inrinni khan DC Playground, Khawtetlang-ah Final khelin zawhfel a ni a, BSF chuan Tuikhuah Veng Cricket Club (TKCC) chu Run 11-a hnehin an champion. Inrinni a Final khelh ah hian BSF te hian Over 14.2-ah Wicket 10 hloh in run 121 an siam a, TKCC te hian hei hi um ve thungin Over 15-ah Wicket 3 hloh in run 110 chiah an siam thei a, run 11 in BSF te hi chakin an champion ta a ni.

Basketball-ah Serchhip tlangval telna sang ber

Basketball Federation of India (BFI) buatsaih 71st Senior National Basketball Championships Men & Women – North East Zone chu nimin khan khelh zawh niin Serchhip tlangval Michael Liansanga, Chanmari Veng telna Mizoram Team chu point hmu sang ber an ni ta a, Mizoram hian nimin khan Assam chu 85-68 a hnehin an dinhmun an ti chiang a ni. North East Zone-ah Mizoram hian dinhmun sang ber an luah avangin nakum January ni 23-31 chhunga National Championship khelh turah an tel thei dawn ta a ni.

COVID-19 hri leng dinhmun

Zirtawpni khan Serchhip District-ah COVID-19 hri kai mi 6 hmuhchhuah niin an zinga 5 te hi Serchhip khua niin midang pakhat hi Bungtlang khua a ni a, Inrinni khan hri kai mi 15 hmuh belh leh niin an zinga mi 10 te chu Chhingchhip khua niin Serchhip-ah mi 3 leh Neihloh leh Thenzawl khua ah mi pakhat ve ve an ni. Hetihlai hian Zirtawpni leh Inrinni khan Serchhip District-ah COVID-19 hri kai mi 58 lai enkawl dam an awm belh thung a, nimin thleng khan Serchhip District-a hri kai hmuhchhuah tawh chu 5735 niin an zinga 5424 te chu enkawl dam an ni tawh a, hri kai enkawllai 293 la awmin hri kai zingah mi 18 an boral tawh bawk a ni.