Mizoram-ah hri kai thar aiin enkawl dam tlem zawk

Mizoram-ah COVID-19 hri kai hmuhchhuah tlahniam ve zel mah se a hniam zawng hian a kal chak lutuk lova, niminpiah khan Sample 2342 enfiah leh niin hri kai mi 328 hmuhchhuah an ni a, Sample enfiah atanga chhut chuan za zela 14.01 zetin hri an kai a ni.

Niminpiah khan ZMC-a RT-PCR Laboratory-ah Aizawl District atanga Sample lak 194 enfiah niin hri kai mi 30 hmuhchhuah an ni a, Veng leh khua 11 atangin hri kai hi hmuh an ni. Fluorescent Immunoassay Test hmangin Aizawl District-ah Sample 12 enfiah ni bawkin hri kai hmuh an awmlo thung.

District 11-a  TrueNat Laboratory te zingah Kolasib, Mamit leh Saitual District tihloh District dang zawng atangin Sample 144 enfiah niin hri kai 54 zet hmuh an ni a, an zinga 22 te chu Lunglei District atanga hri kai hmuh te niin Khawzawl District-ah hri kai 10 hmuh an ni bawk a, Champhai District-ah 9, Hnahthial District-ah 7, Serchhip District-ah 4 leh Aizawl District-ah hri kai mi 2 hmuh an ni bawk.

Rapid Antigen Test hmangin niminpiah khan Sample 1992 enfiah niin heng atang hian hri kai mi 243 hmuh an ni a, an zinga 102 te chu Aizawl District atanga hri kai hmuh te niin Baktawng Chhuanthar-ah hri kai mi 19 lai hmuh leh an ni a. Khawzawl District atangin hri kai mi 43 hmuh niin Serchhip District-ah 41, Lunglei leh Champhai District-ah 16 ve ve, Mamit District-ah 13, Lawngtlai District-ah 7, Hnahthial District-ah 3 leh Siaha leh Saitual District-ah hri kai mi pakhat ve ve hmuh an ni bawk.

Nimin khan Mizoram-a hri kai enkawl zingah mi 278 te chu anmahni enkawlna hmun atanga chhuahtir an ni ve leh a. Heti hian nimin tlai dar 5:00 thleng khan Mizoram-a hri kai hmuhchhuah chu 1,37,705 niin an zinga 1,34,373 te chu enkawl dam an ni tawh a, hri kai hmuh tawh atanga za zela 97.58 te enkawl dam ni tawhin hri kai enkawllai 2820 an la awm bawk. Nimin leh niminpiah ah hri kai boral mi pahnih chhinchhiah belh niin Mizoram-a hri kai zingah mi 512 an boral tawh a ni.