Chanchin thar thenkhat :

Chanchin thar thenkhat :

(Dec. 29, 2021)

WHO in COVID-19 dona hmanrua hlan :

World Health Organisation (WHO) chuan COVID-19 hri pui leng dona kawnga hmanraw pawimawh tak, Sample Test Kit chu Mizoram tan an hlan a, hei h India tangka-ah chuan cheng vbc. 4 hu vel a ni. Heng WHO thilpek hi nimin khan Health Minister Dr. R. Lalthangliana chuan a Pisa-ah dawngin Sample test kit an hlan hi South Korea siam Rapid Antigen Test Kit (RAgT) 3,60,000 leh RT-PCR Test kit 1,80,000 a ni a. WHO aiawhin Dr. Lalhlimpuii, Surveilance Medical Officer, WHO chuan a hlan a. Dr. Lalhlimpuii chuan WHO in State bil tan COVID-19 sample test kit hi a lei ngai lova, Health Minister in theihtawp chhuaha hma a lakna an hriatin an ngai pawimawh em em a, India ram level-ah a tihfel theih loh avangin WHO, South-East Asian Region Office-ah tih a ngai a, hei vang hian July thla a dil ni daih tawh kha a tlai phah deuh a ni, a ti a. PPE kit 5000 Mizoram tan an pek leh tur thu a sawi bawk.

He hunah hian Health Minister Dr. R. Lalthang-liana WHO chungah lawmthu sawiin, kum thar lo thleng turah tluang taka an hmalakna te a hlawhtlin theih nan duhsakna a hlan a. Kumin July thla khan WHO hian Mizoram tan Oxygen Concentrator engemawzat an hlan tawh a, hetih hun lai hi Mizoram-a COVID-19 hri kai kan tam vanglai tak a ni bawk nen, kan sum dinhmunte thlirin rilru a hah em em mai a, tlawm leh zah pawh dawn lova remchanna la in ka thahnem-ngaiin kan mamawh dangte ka lo thlen ve ringawt mai a, beisei sang lutuk ngam lovin theih ang angin kan umzui a, Pathian in remruatna felfai tak a nei a, a hun takah WHO kaltlangin tanpuina kan dawng hi a lawmawm takzet a ni, a ti.

Health Minister chuan kum 2 dawn hripuiin min chenchilh chhung hian India ram pawn, ramchhung leh Mizoram chhung atangin tanpuina chhiarsen loh kan dawng tawh tih sawiin, “Heng tanpuina kan dawnte hi kan chhinchhiah vek a, mimal, pawl, kohhran, office leh company ang te a tanpuina min petute chungah lawmthu ka sawi a, a bik takin RT-PCR test kit leh RNA extractor hi a to in a hautak em em a, ICMR in a thlawna min pek tawh zawng zawng hi cheng vbc. 20 chuang hu a ni tawh a ni,” a ti bawk.

Health Secretary R. Lalramnghaka pawhin COVID-19 Variant thar Omicron a rawn chhuah takah hian sawrkar laipui chuan State leh UT sawrkar zawng zawngte vawi duai lo lehkha rawn thawn tawhin COVID-19 sample test zat hi nasa taka ti pung turin a rawn ti mek tih a sawi a, “Kan dinhmun thlirin sample test kit lei hi a hautak takzet a, mamawh belhna a sang lehzual bawk a, hetih hun lai taka WHO an rawn lang hi a lawmawm takzetin anmahni kal-tlangin Pathian a che a ni tih a lang a ni,” a ti.

Mizoram titha ber dinhmun a hauh :

NITI Aayog chuan Pathianni kalta a Good Governance Index, 2021 a tichhuah ah North-East and Hill States Category-ah Mizoram chuan Public Health Sector ah a titha ber pakhatna dinhmun a hauh. Hemi chungchang hi Health Minister Dr. Lalthangliana  chuan a sawi a, Commerce & Industries Sector-ah pawh a titha berte zingah puan a ni tih a sawi a, heng malsawmna hi Zoram mipuite leh sawrkar Department te theihtawp chhuaha an intawiawm tlanna in a rah chhuah a ni, a ti a. Hmasawn zel tura tanrual tlan zel a ngai a ni tih a sawi bawk.