Serchhip damdawi In-a thil thleng chhui turin Serchhip District Magistrate ruat a ni

Tunhnaia Serchhip damdawi In-a thil thleng chungchangah Magisterial Inquiry la turin Serchhip DC, District Magistrate Kumar Abhishek IAS chu ruat niin ni 30 chhunga report thehlut tura tih a ni a. MGDA hruaitute chuan Serchhip rawn tlawh mekin Vawiin ah Health Department hotute pawhin Serchhip hi an rawn tlawh bawk ang.

Nimin khan sawrkar chuan thuchhuah siamin Health Minister Dr. R. Lalthangliana chuan Malsawmkimi, Tlangpui khua District Hospital Serchhip-a raicheh a thi leh a fa hrin boral leh Vanlalhlimpuii, Sialsir khua District Hospital Serchhip a enkawl anih dan ah leh a fapa hrin boral chungchangah te mipui lungawilohna Social Media a langte chhui turin niminpiah khan Health & Family Welfare Department chu hma la turin a hriattir a. Hemi chungchang ah hian Serchhip DC, District Magistrate ni bawk chu Magisterial Inquiry la turin Sawrkar chuan a ruat dawn tih a tarlang a. Hei bakah hian Health Minister chuan Dr. ZR. Thiamsanga, Vice Chairman, Health & Family Welfare Board, Health Secretary leh Official dangte chu Vawiin hian a hmun tlawh tura an kal tur thu a sawi bawk.

Hemi hnu nimin vek khan Health Secretary R. Lalramnghaka chuan thuchhuah siamin heng thil thleng pahnih chungchangah Magisterial Inquiry ti turin Serchhip District Magistrate Kumar Abhishek IAS chu sawrkar in a ruat tih tarlangin, ni 30 chhunga a report te thehlut tura tih a nih thu a tarlang bawk a ni.

Hetihlai hian Mizoram Government Doctor Association (MGDA) hruaitute chuan nimin tlai khan Serchhip rawn thlengin nizan khan Serchhip Tourist Lodge-ah Serchhip-a Doctor te nen tunhnaia Serchhip damdawi In-a thil thleng chungchang hi an sawiho a. Thudawn danin MGDA hruaitute hi nizan khan Serchhip-ah hian riakin Vawiin chawhnu lam hian Serchhip District NGO Coordination Committee hruaitute, Serchhip Thalai Pawl (STP) hruaitute leh Serchhip-a thuthar thehdarhtute chu an kawm leh nghal dawn bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man