Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip Chanchin thar thenkhat :

Serchhip Chanchin thar thenkhat :
(24th Dec., 2021)

STP in Champhai DC hmalakna fakawm an ti :

Serchhip Thalai Pawl (STP) chuan Dan lova sumdawngte dapchhuahna kawngah Cham-phai DC in huaisen taka hma a la chu fakawm an tih thu an sawi. Nimin a thuchhuah an siam ah STP chuan tunhnaia Champhai District-a Dan lova sumdawngte chunga hma laa theihtawp chhuahtu Maria CT. Zuali hmalakna chungchang leh a chhehvel thu kal zela ram pum huap nghawng thu lengvak awm mekah Serchhip Thalai Pawl te chuan Dan lova sumdawngte dapchhuahna kawngah Cham-phai DC in huaisen taka hma a la chu fakawm an tih thu sawiin, a hmalakna avanga dan lova sum-dawng ten an khinglet mek ni a lang chu pawi an ti hle tih an sawi a ni.

STP chuan Champhai District a dan lova sumdawnna lian tak awm mek hi titawp turin kan sawrkar pawh an ngen thu sawiin, hetianga dan lova sumdawnna hi mirethei zawk ten an tawrh mai bakah India ram Economy in nasa takin a tuar mek niin an sawi a, chuvang chuan dan ang taka sumdawnna hi kalpui a nih theih nan leh, dan lova sumdawnna kalpui mek tute hi dap-chhuak a dan anga an chunga hma la turin sawrkar an phut thu an sawi a Dan kalha thiltih a awm anih chuan an dodal zel dawn tih an sawi bawk.


Dan lova Kuhva lakluh leh phurh khap a ni :

Serchhip District Magistrate Kumar Abhi-shek IAS chuan Serchhip District chhung khawi hmunah mah dan ang ni lova Kuhva lakluh leh phurh phal a ni lo tih a sawi. Hemi chungchanga nimin a thuchhuah an siamah Serchhip District Magistrate chuan Serchhip District chhung khaw hrang hrangah dan ang ni lova Kuhva phur lirthei an kal thin tih hriat a ni tih tarlangin, Serchhip District chhunga dan phal loha Kuhva phurh a lo rem theih nan khapna thupek chhuah tula a hriat thu a tar-lang a. Section 144 of Cr.PC 1973 in thuneihna a pek angin Serchhip District chhung khawi hmunah mah dan ang ni lova Kuhva lakluh leh phurh phal a ni lo tiin thuchhuah a siam ah hian a tarlang a ni.

He thupek hi thu leh awm hma chu chhuah a nih (December 23, 2021) atanga thla hnih (2) chhung huam tur niin thupek zawmlo chu Section 188 IPC dan hmangin hrem theih an ni ang tih a tarlang bawk.

Serchhip DC sawn dawn :

Serchhip District Bawrhsap Kumar Abhi-shek IAS chu Delhi lamah sawn a ni dawn ta a, hemi atan hian Ministry of Home Affairs chuan Order pawh tichhuak tawhin Mizoram a chhuahsan hun tur tak erawh hriat theih ala ni lo thung.


Hri kai 10 hmu; Sample en chawl dawn :

Nimin khan Serchhip District-ah COVID-19 hri kai mi 10 hmuh belh an ni a, an zinga mi 7 te hi Chhingchhip khua niin Chhiahtlang-ah 2 leh Serchhip-ah hri kai mi pakhat hmuh an ni bawk. Nimin vek khan Serchhip District-ah hri kai mi 35 enkawl dam an ni.

Heti hian Serchhip District-a hri kai hmuh tawh zawng zawng chu 5789 niin an zinga 5610 te chu enkawl dam an ni tawh a, hri kai hmuh tawh atanga za zela 96.90 te chu enkawl dam ni tawhin hri kai enkawllai 161 an la awm a, hri kai zingah mi 18 an boral tawh a ni.

Niminpiah khan Mizoram-ah Sample 3066 enfiah niin heng atang hian COVID-19 hri kai mi 241 hmuhchhuah niin Sample enfiah atangin za zela 7.86 te chuan hri an kai a. ZMC-a RT-PCR Laboratory-ah hri kai mi 43 hmuh niin TrueNat Laboratory-ah hri kai mi 9 hmuh an ni a, Rapid Antigen Test hmangin hri kai mi 189 hmuh an ni bawk. Nimin khan Mizoram-ah hri kai mi 245 enkawl dam an ni bawk a, heti hian nimin tlai dar 5:00 thlenga Mizoram-a hri kai hmuhchhuah tawh zat chu 1,40,143 niin an zinga 1,38,006 te chu enkawl dam niin hri kai atanga chhutin za zela 98.48 te enkawl dam an ni tawh a, hri kai enkawllai 1602 la awmin hri kai zingah mi 535 an boral tawh a ni.

COVID-19 Sample enfiahtute hian chawlh an hman dawn avangin Booth hrang hranga Sample enfiah chu chawlh rih a ni ang.


Comments

Popular News (Last 30 Days)