Hri kai enkawllai tam lamah Serchhip District-in pahnihna dinhmun luahin hmalak dan tur sawiho a ni

Mizoram District zingah Serchhip District chu Aizawl tihloh ah COVID-19 hri kai enkawllai tamna ber a ni mek a, tunhniah hri kai hmuhchhuah an tam avang leh kan hma lawka hunpui lo thleng turah hri leng a darh lohna tur ngaihtuahin nimin khan Serchhip District Disaster Management Authority (DDMA) thutkhawm chu neih a ni.

Nimin chawhnu-a Serchhip District Disaster Management Authority (DDMA) thutkhawm Serchhip DC Meeting Hall-a neih hi an Chairman leh District Bawrhsap Kumar Abhishek IAS chuan kaihruaiin tunhnaiah Serchhip District-ah COVID-19 hri kai hmuhchhuah an tam thu leh dinhmun tha lo takah kan din mek thu sawiin, Mizoram District hrang hrang zingah hri kai enkawllai tam lamah pahnihna kan nih mek thu leh hri leng darh mek titawp tura nasa taka tan kan lak a tul thu a sawi a. Hri leng chungchang ah kan dinhmun tha lo mah se kan hma lawka Krismas leh Kumthar hunpui lo thleng tur chu mipui ten hlim leh thlamuang taka an hman theih nan inkharkhip puan chu thil remchang a nih loh avangin CAB zawm thu ah khauh takin Dan leh thupek kenkawh a pawimawh dawn thu a sawi a. Serchhip District chhungah kar khat chhunga hri kai tam zualna bikte chu uluk lehzuala en thlithlai tur anih thu sawiin, Test runpui neih a ngai anih chuan a rang lama hma la turin Health Department chu a ngen bawk.

Krismas leh kumthar hunpui lo thleng turah hri a darh loh nan khauh taka Dan leh thupek kenkawh a ngai tih sawiin Bawrhsap chuan, Police te chu hemi kawnga tan la turin an ngen bakah Patroling pawh nasa zawka nei turin a ngen a, Veng tina VLTF te pawh hunpui chhung chuan tharthawh leh a, chak zawka hma la thar leh tura ngen nise tiin khawlai bakah dawr neitute pawhin CAB an zawm that leh thatloh uluk taka endik thin nise a ti a, tun hunpui vuakvet-ah hian Executive Duty te pawh a tul anga Duty tir leh nise an ti bawk a ni.

Serchhip District-a hri leng mek dinhmun thlirin Covid vanga thihna thleng ah COVID-19 vaccine a dose kim a la tawhte chuan an tawrh dan a nep bik tih chiang takin a hmuh theih a, Vaccine lak chu mitinin kan ngaihpawimawh thar leh a ngai tih a sawi bawk a. He thutkhawm a tel NGO aiawhte chu Vaccine lak a pawimawhna nasa lehzual a puanzar kawnga thawhho puiah a sawm a ni.

He hunah hian Dr. Christopher L. Hmar, Orthopaedic Surgeon, District Hospital Ser-chhip chuan COVID-19 hri leng meka Serchhip District dinhmun tarlangin nimin thleng khan Serchhip District-ah hian COVID-19 hri kai 5609 hmuhchhuah ni tawhin an zinga 5255 te chu enkawl dam an ni tawh a, hei hi hri kai hmuhchhuah atanga chhutin zaa 93.7 a ni a, hri kai enkawl lai 337 awmin an zinga 125 te chu kum 18 hnuai lam an ni a, a bak 212 te chu kum 19 chunglam an ni thung a. Hri kai enkawllai zingah hian kar kalta a hri kai hmuhchhuah an tam hle tih tarlan a ni.

Hri kai zingah mi 17 an boral tawh a, hri kai hmuh tawh atanga chhutin boral zat hi zaa 0.3 ang a ni a, Serchhip District-a hri kai boral tawh zinga mi 13 te hi Vaccine la lo niin midang 4 te hi vaccine la zo tawh te an ni a. Serchhip District-a hri kai enkawllai mi 337 zinga 156 te hi Vaccine la la lo niin mi 24 te chu Vaccine Dose 1-na chauh la an ni bawk.

Nimin a thutkhawm ah hian tlawmngai pawl aiawhte pawhin kan dinhmun leh rawtna an neih te tarlangin, puipunna leh khawhar In-a zai chungchang sawilan a ni a, zai chu hri inkaidarhna awlsam tak anih avangin a theih hram chuan zaiho rihloh nise an ti a. Kohhran thenkhat ten Krismas leh Kumthar lawmna atana ruai buatsaih an tum chungchang pawh sawi-chhuah ni bawkin, hei pawh hi Health Department thurawn angin ruai hi buatsaih rihloh nise an ti a. Serchhip District-a COVID-19 hri leng dona hmanrua mamawh te pawh ngaihtuah dan tur sawiho a ni bawk.