MZP in zirna ngai pawimawh hmasa ber tih sawi

Mizo Zirlai Pawl (MZP) President Lalnunmawia Pautu chuan zirna chu an ngaih pawimawh hmasak ber a ni tih a sawi.

MZP General Hqrs. buatsaih nimin-a Reiek Tourist Resort-a ‘Leadership and Nationalism Training cum Advent Christmas’ ah he thu hi sawiin MZP President chuan MZP din chhan lian ber chu, Zirlaite leh ram leh hnam tan a ni tih a sawi a, “Ram leh hnam damna tur a nih phawt chuan theihtawp chhuahin MZP in hma kan la zel dawn a, Hnam a ral aiin MZP hi a ral hmasa tur a ni tih hi MZP ngaihdan a ni,” a ti a. “MZP hi zirlai pawl a nih angin, Zirna hi kan ngaihpawimawh hmasak ber a ni a. Chutih rualin, a tul huna sawrkar thawhpui a, a tul huna sawrkar sawisel ngam hi Preasure Group kan nih anga kan tih tur a ni,” a ti bawk. 

He hunah hian Chin State Chief Minister Salai Lianluai pawhin Mizoram mipui zawng zawng, Kohhran leh NGO ten Myanmar raltlante an lo dawnsawn danah leh an buaipuina ah lawmthu sawiin, “Raltlan kan nih angin mi fel ber ber lo kal kan ni lova, khawtlang leh ram tana hnawksak zawnga khawsa kan lo awm palh a nih pawhin, hriatthiamna leh hmangaihna nen min enkawl hram hram turin ka ngen che u a ni,” a ti bawk.