Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip thuthar thenkhat :

Serchhip thuthar thenkhat :
(December 21, 2021)

Serchhip SP in YMA hruaitute a kawm :

Serchhip District SP Stephen Lalrinawma chuan nimin (Dec. 20, 2021) khan Serchhip Sub-Hqrs. YMA hruaitute leng-ah sawmin Krismas leh kumthar vuakvet-a venhimna leh Dan leh thupek kenkawh kawnga an inbuatsaihna te a sawipui. Serchhip SP Office Chamber-a Serchhip Sub-Hqrs. YMA hruaitute a kawmna ah hian Serchhip SP chuan Krismas leh kumthar vuakvet mipui ten hlim leh thlamuang taka an hman theihna turin ruahmanna an lo siam tawh thu leh hma an lo lak tawh thu a sawi a. Amaherawh chu Police te chu thawktu tlemte an nih avangin YMA leh VDP te nen an tanho a pawimawh thu sawiin, YMA te nen thawhhona tha tak an lo neih tawh thin thu a sawi.

Serchhip SP chuan tun thla ni 7 khan mipuite hnena ngenna an lo tihchhuah tawh thu sawiin, halpuah leh halmawi te dapchhuah hna an lo thawh tan tawh thu te, Traffic Duty pawh ngawrh taka an kalpui tawh thu te, zu leh ruihhlo dahchhuah hna te pawh ngawrh taka an lo thawh tawh thu te a sawi a. Hei bakah hian December 22 atangin kawngpui dungah chhun leh zan inzawmin duty an indah dawn thu sawiin, Serchhip khawpui chhung chu Zone pahnih (2) ah thenin SDPO leh RO ten vilin an tlawhkual reng dawn tih a sawi bawk.

He hunah hian Serchhip Sub-Hqrs. YMA hruaitute hi an President Kawlthuama hova telin hetianga SP in YMA hruaitute a sawm chu lawm-awm an tih thu an sawi a. Halpuah leh halmawi dapchhuah hna ngawrh taka kalpui tul an tih thu te, Silai lem a mu nei pawh dapchhuah hna ngawrh lehzual kalpui tul an tih thu te, hunpui vuakvet ah YMA Branch te pawh Duty leh tura ruahmanna an siam thu te sawiin, heng Duty te tlawhchhuak tura ruahmanna an siam thu te an sawi bawk.

He hunah hian mipui ten hlim leh thla-muang taka he hunpui an hman theih dan tur leh dan leh thupek kenkawh kawnga hmalak dan tur bakah hri leng laka himna dan kenkawh dan turte an sawiho a. Nikum lamah Halpuah leh halmawi khapna thupek bawhchhiatna kaihhnawih ah Serchhip Police Station-ah thubuai pahnih ziahluh a nih thu he hunah hian sawilan a ni bawk.

He inkawmhona ah hian hunpui laiin YMA hruaitute leh Police hotu lian ten khawpui chhung a huho-a tlawhkual nise tiin ruahmanna an siam bawk a ni.

Executive Magistrate Duty tur ruat :

Serchhip District Magistrate Kumar Abhishek IAS chuan thupek tichhuakin kum 2021 Krismas leh kumthar 2021 lawmna neih chhunga Serchhip Town chhunga Executive Magistrate duty tur a tarlang a. December 20-27, 2021 chhungin F. Lalnisai, SDC leh December 28, 2021 atanga January 2, 2022 chhungin C. Laltleipuii, SDO (Sadar) te an ni ang.


Serchhip Officers’ Club in raltlan an tanpui :

Serchhip Officers’ Club (SOC) chuan Myan-mar atanga Mizoram-a raltlan awmna khaw hrang hrangah nimin khan tanpuina an semchhuak a, tun tumah hian North Vanlaiphai khua ah tanpuina dawng tam berin chhungkaw 10 tan Rs. 36,000/- sem a ni a, Sailulak khua ah Rs. 5000/-, Leng khua a chhungkaw pahnih tan Rs. 6000/-, Hmuntha khua ah Rs. 3000/-, Thentlang khua ah chhungkaw pahnih tan Rs. 8000/-, Chhiahtlang khua ah Rs. 5000/- leh Serchhip Chhim Veng-a mi 3 te hnenah Rs. 15,000/- leh Dinthar Veng-a chhungkaw pakhat hnenah Rs. 3000/- an hlan a, a vaia an sum hlan hi chhungkaw 21 tan Rs. 81,000/- a ni.


Serchhip Police ten Zu man hnem :

Serchhip Police te chuan Zirtawpni zan khan Thenzawl dai ah tualchhung siam Zu tam tham tak manin a kengtute leh an phurhna motor te chu man nghal a ni. Thudawn danin Serchhip Police te hian Zirtawpni khan hmun hnih ah lirthei enfiah hna hi thawkin zan dar 11:30 velah Chalkhan-ah Scorpio Car (Mz-03-2425) atangin heng Zu te hi an man a, an zu man hi Rambo Polythene a dah niin a vaiin litre 290 niin litre 10 zelin pack 29-a dah hran a ni. Heng Zu rawn phurtu Laltanpuia (32), Chanmari West Aizawl, tuna Phunchawng-a khawsa mek nia insawi leh a kalpui Rohit Chakma (19), Marpara South, tuna Phunchawng-a khawsa mek nia insawi te chu man in thubuai siam sak an ni.

Heng mite hian heng Zu te hi Phunchawng atanga an rawn phurh nia sawiin, Thenzawl-a dah tur niin an sawi a, Serchhip Police te chuan thubuai ziaklutin Inrinni khan Serchhip District Court-a hruai an nih hnuah Jail-ah thawn nghal an ni. Heng Zu te hi fun khat Rs. 1000/- man zel niin a vaiin Rs. 29,000/- man vel nia chhut a ni.

YMA ten thisen pe :

Serchhip P&E Veng Branch YMA chuan nimin khan Serchhip Blood Bank-a dah turin thisen Unit 16 an pe a, thisen petute hi mipa 9 leh hmei-chhia 7 niin Serchhip Blood Bank-ah kalin thisen hi an pe a ni.


NHM-a thawk te nawrh titawp :

National Health Mission Employees Union Mizoram (NEUM) chuan thuchhuah siamin an thilphut hrang hrang ah Health Minister in hmalakpui a tum avang leh Health Secretary pawhin theihtawp chhuahpui a tiam avangin nimin zing dar 7:00 khan tiamchin awm lo nawrh an huaihawt chu an titawp tih an sawi.


Serchhip District COVID-19 dinhmun

    Nimin khan Serchhip District-ah COVID-19 hri kai mi 6 hmuh belh niin mi 117 zet enkawl dam an ni a, heti hian Serchhip District-a hri kai hmuhchhuah chu 5741 ni tawhin an zinga 5541 te enkawl dam an ni tawh a, enkawllai 182 la awmin hri kai mi 18 an boral tawh a, hri kai hmuh tawh atanga za zela 96.51 enkawl dam an ni tawh a ni.

Comments

Popular News (Last 30 Days)