Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

MLB thlirlawkna hun nei

Human Resource Development Board (HRDB) buatsaih, ‘Mizo Language Board Thlir Lâwkna’ chu Hyve Aizawl City Hall-ah neih niin zanin atang hian Cable TV-ah pekchhuah a ni ang. Mizo Language Board Thlir Lâwkna hi Dr. Rosaline Varsangzuali’n kaihruaiin School Education Minister Lalchhandama Ralte chuan MLB din tum a nih dan leh hmalakna kal mêk chungchâng sawiin, MLB din tura hmalakna hi Chief Minister-in HRD Board meeting a neihpui tuma Mizo tawng chungchanga hmala tura a chah bawhzuina a nih thu sawiin, he hun hi a hawng a. Thupui thlan bik panga hmangin he sawihona hun hi hman a ni.


Lengpui-a KVK tlawh

National Bank for Agriculture and Rural Development (NABARD) Chairman GR. Chintala chuan Inrinni khan Krishi Vigyan Kendra (KVK) Mamit District, Lengpui tlawhin Senior Scientist and Head Dr. Vanlalhruaia Hnamte leh a thawhpui Subject Matter Specialist ten lo dawng-sawngin in kawmhona an nei a. KVK Mamit District chuan an hmalakna thenkhat te lo hrilhin Mizoram farmers te tana Fund an rawn pek thin a vangin lawmthu an sawi a. G.R. Chintala chuan Mizoram-ah hian Coffee, Kuhva, Black pepper (Thing Hmarcha), Aieng, Thakthing, Elaichi te a that duh avangin ching uar sauh sauh tur leh hlawkna tham tharchhuah tum turin KVK hotute chu a chah a ni.


Kumthar-ah LCM inthlan beisei

UD&PA Department changtu Deputy Chief Minister Tawnluia chuan Lunglei Municipal Council din turah sawrkar kumthar (2022-2023) chhungin inthlan buatsaih hman beisei a ni tih a sawi a, LMC dinna tura thil pawimawh hrang hrangte bawhzui mek a nih thu sawiin, an Pisa tur dap mek a nih thu leh Ward then dan ngaihtuah tur pawh din tura hmalak mek a nih thu leh LMC dinna atana hman mai theih turin cheng nuai 18 vel an neih thu a sawi bawk.


Kumthar-ah ZMC OPD hawn tum

Aizawl South-III MLA Prof. F.Lalnunmawia chuan kar kalta chhung khan a bial-a khaw hrang hrang tlawhin ZMC-a OPD tal hawn leh thuai a nih theih nan ZMC hotute a sawipui thu a sawi a, “Harsatna dangte a awm loh chuan kumthar January thla chawhnu lamah OPD tal chu hawn leh theih tawh beisei a ni,” a ti.


Excise Minister a awm mai mai lo - MNF 

Mizo National Front (MNF) chuan Excise & Narcotics Minister leh MNF Adviser Dr. K. Beichhua chu ruihhlo donaah a awm mai mai lo tih an sawi. Thuchhuah an siamah MNF Party chuan Dr. K. Beichhua chu ruihhlo dona ah a thawhhlawk hle nia sawiin, assets (hmanrua) beitham tak nen a che tha hle niin an tarlang a. Excise & Narcotics Department chu thawktu mi 380 chauh leh lirthei indaih lo tak chungin, ruihhlo do chhunzawm chho zelin hmun hrang hrangah an che na hle, an ti a. Dr. Beichhua pawhin ‘Rangvamual te khu tunah zuk kalin zu enthlithlai mah ula, tunhmaa a tawp thin dante ngaihtuahin, tun dinhmunah chuan felfai tawh tak a ni tih in hmu thei maiin ka ring,’ a ti tih an sawi a. A tul chuan amah ngei pawh ruihtheih thil dapin vawi engemaw zat ramhnuaia a luh tawh thu sawiin, “Ruihhlo kan tirem vek dawn kan ti lo. Amaherawhchu theihtawpin kan do zel dawn,” a ti bawk.


Ram 2 intlawhpawh dan la pangngai thei lo

Nikum September thla khan sawrkar laipuia Ministry of Home Affairs (MHA)-in Myanmar nena insumdawntawnna leh inkalpawhna kawngka hawng tawh mah se, tun thlengin dan pangngai anga intlawh-pawh hleihtheih a la ni lo. Zawhna chhangin Champhai Bawrhsap Maria CT Zuali chuan, “Hripui leng avangin Border Trade hi khar reng a nih hnuah MHA chuan a hawng tawh a. Mahse, Myanmar atanga raltlan avangte leh hripui leng avang ten dan pangngai angin kan la intlawhpawh ngam chiah lo,” a ti. Ram pahnihte inremna angin Myanmar leh India ram chhung KM 16 bial ve ve duh duha passport tel lova intlawhpawh theihna (free movement regime) kalpui thei tawh tura ngaiin kan inbuatsaih a. Mahse, chhan hrang hrang avangin khi lam an inkhar laiin kan inhawng a, Mizoram kan inkar a, anni lam an inhawng leh a. Kan inhlau tawn a ni ber,” a ti bawk.


Mizoram in vawi 4-ah vawi 2 hnehna chang

Mizoram Cricket Team te chuan Inrinni khan Arunachal Pradesh chu Wicket 5-a hnehin nimin-ah Meghalaya an hneh lo thung. Vijay Hazare Trophy khelh mekah Inrinni khan Mizoram Cricket Team te hian Jaipur-a Soul Feel Cricket Stadium-ah Arunachal Pradesh hi hmachhawnin Toss-a chak Arunachal Pradesh hian vuak hmasak an thlang a, Arunachal Pradesh hian Over 50-ah run 218 siamin Wicket 5 an hloh a, Mizoram hian vaw ve leh thungin an target hi Over 47.5 ah umphakin Wicket 5 an hloh a, ball 13 lai an hmang bang bawk a ni.

Mizoram hian nimin khan Meghalaya hmachhawn lehin run 19 in an chaklo a, Mizoram hian vawm hmasak thlangin Meghalaya in over 49-ah run 237 an siam a, Mizoram in Over 50-ah mi 7 out in run 218 chiah an siam avangin Meghalaya hi run 19 in an chak ta a ni. Mizoram hian match 4-ah vawi 2 chakin vawi 2 bawk an tlawm ta a ni.


Commonwealth-ah Jeremy-a'n Gold Medal a hlawhchhuak

Senior World Weightlifting Championships leh Senior Commonwealth Weightlifting Championships Tashkent, Uzbekistan-a neih mekah Jeremy Lalrinnunga chuan 67 Kg Men Senior Commonwealth Weightlifting-ah Gold medal lain Senior World Weightlifting-ah pasarihna (7) a ni thung. December ni 7 atanga tan Senior World Weightlifting Championships leh Senior Commonwealth Weightlifting Championships hi December ni 17-a zawhfel tura ruahman a ni a. Jeremy Lalrinnunga hian Snatch (Direct) chawi kan-ah a hmasa berah kg. 136 zo lovin a vawi hnihna ah kg. 136 a chawi a, a vawi thumna ah kg. 141 chawi zo lehin New National Record a siam ta a ni.

Clean and Jerk (Indirect) Awm (chest) a dah kan phawta char leh-ah a vawi khatnja ah kg. 164 chawiin a vawi hnihna ah kg. 168 a chawi leh a, a vawi thumna ah kg. 168 a zo lo ve leh thung a ni.

Snatch-a a chawi rit ber kg. 141 leh Clean & Jerk-a chawi rit ber kg. 164 te belhkhawm kg. 305 hi Jeremy-a chawi niin Commonwealth Senior Weightlifting Championships kg. 67 category-ah Gold Medal a la a, Senior World-ah ah Pasarihna a ni phak bawk a ni.

Chawimawina dawn lawm

Kum 1971 India leh Pakistan indona a 5th Assam regiment ten Chhamb indona, Battle of Chhamb avanga chawimawina, Battle Honor an dawn kum 50-na chu Inrinni khan Ex-Fighting 5th Association (EFFA) ten an lawm a, he hunah hian he indona-a an tel dan te sawiin, an thawhpui boral tawh te sunna an nei bawk.

Comments

Popular News (Last 30 Days)