Lunglei-ah RT-PCR Laboratory hawn a ni ta

Lunglei Zotlang Tourist Lodge Building-a RT-PCR Laboratory chu nimin khan Health Minister Dr. R. Lalthangliana chuan hman theih turin a hawng.

Nimin-a he Laboratory hawnna hunah hian Health Minister Dr. R. Lalthangliana chuan tun tum hi RT-PCR khawl a hawn hmasak ber a ni tih sawiin, “ZMC lama RT-PCR kan neih tantirh lai khan, lockdown vanglai tak a ni nen, thiltih zung zung a harsa hle a, RT-PCR pawh chhimlam-a dah ve nghal hi kan duh khawp mai a. Khatih lai vel khan Pu Zodintluanga MLA zahawm tak hi ka Office-ah a lokal a, Lunglei lam tan RT-PCR khawl cheng nuai 20 man vel rawn donate mai a duh thu a rawn sawi a, khawl in a kentel, a senso neuh neuh leh a building-te enfel nan hun reilote min lo nghak lawk tura ka tih laiin engkim a lo peihfel hman a, a chungah pawh ka lawm hle nghe nghe zawk a ni,” a ti.

Health Minister chuan Chief Minister hnenah ‘RT-PCR khawl chauh ni mai lo, Multipurpose Laboratory hi Lunglei lamah din ve mai ang’ tiin rawtna a siam thu sawiin, Chief Minister pawhin rem tiin cheng nuai 800 man DPR an siam nghal thu leh tunah hian Civil Hospital Compound Lunglei-ah din turin a bante an phun tawh tih a sawi a. “RT-PCR hi a khawl hrim hrim hi chu cheng nuai 20 man vel niin ka hria a, vawiin a kan khawl hawn tak pawh hi a kaihhnawih neuh neuhah chuan cheng nuai 100 bawr vel dawn kan seng mek a ni,” a ti bawk.

Lunglei-a RT-PCR Laboratory hawnna hun hi Health Secretary R. Lalramnghaka chuan kaihruaiin Er. H. Lalfakzuala, Sr. EE leh Dr. SR. Ngurchamliana Medical Superintendent Civil Hospital Lunglei-ten Technical report an pe a. Laboratory tan hian cheng nuai 66.65 sen a ni a, cheng nuai 53.82 chu pawisa pek tawh niin, Generator, Air Condition leh External Electric connection atan cheng nuai 12.83 chu expenditure sanction la hmuh loh, fel tawh sa dawn mai tur a awm a. Hei bakah equipment hrang hrang atan cheng nuai 23,88,930 sen a ni bawk. A senso zawng zawng tan cheng nuai 100 dawn hman a ni.

Health Minister hian Baptist Covid Care Centre (BCCC) Christian Hospital Serkawn din chu tlawh nghalin damlo kanna Rs. 30,000/-, PPE hmanraw hrang hrang leh damdawi engemaw zat a pe nghal bawk.

Hei bakah hian Lunglei Civil Hospital Complex-ah (Dedicated Covid Health Centre (DCHC) ICU khum 28 awmna chu Health Minister hian a hawng nghal bawk a, hei aia tha leh changtlung zawk pawh an la hawn belh thuai dawn tih sawiin, Covid do chung-changa kan tanrualna Pathian in mal a sawm tih a sawi a, “Kumthar lamah chuan Covid hi a ziaawm zel theih nan tawngtai bang lo ang u,” a ti bawk.