Mizoram-a Myanmar raltlante tan theihtawp a chhuah zel tur thu Chief Minister in a sawi

Chief Minister Zoramthanga chuan Mizoram-a Myanmar raltlante tan theihtawp a chhuah zel tur thu a sawi.

Chief Minister hian nimin khan CM Conference Hall-ah Myanmar ram-a mipui thlan hruaitu rual, Mizoram-a awm mekte nen inkawmna neiin Myanmar rambuai avanga mipuiten harsatna namen lo an tawk chu pawi a tih thu sawiin, mahni sahimna zawnga ram danga kal zingah a then India ram-a rawn lut te chu Mizoram chuan chhawmdawl turin theihtawp a chhuah thu leh theihtawp a chhuah zel tur thu a sawi a. India sawrkar hotute bulah pawh raltlante chhawmdawl chungchang hi vawi tam sawipui tawhin, tunhnaia Prime Minister leh Union Home Minister a hmuh tum pawhin tuamhlawm an mamawh zia a sawipui thu te, Myanmar rama mipui sawrkar ngelnghet tak din tura an entawn tur tha ber chu India ram a nih thu te, India ramin Myanmar chu a ensan theihloh thu a hrilh thute sawiin, anni pawhin an ngaihven thu Chief Minister chuan a sawi a ni.

He hunah hian Chief Minister Zoramthanga chuan kum sawm dawn kaltaa Myanmar ram sawrkar leh ramhnuai mite inkara inremna a awm theih nan a ruahmanna a lo siam pui tawh dan te a sawi bawk a. A karah thil hrang hrang thleng in beisei loh harsatna a awm chu pawi a tih thu a sawi a. Chief Minister chuan hun rei vaklo ah democracy hi Myanmar ah tundin a nih leh ngei a rin thu a sawi a. Theihtawp in huaisen takin an tan a beih zel tur thu a a sawi bawk a ni. Harsatna an neih chuan a theih chin chinah sutkian sak dan ngaihtuah zel a inhuam thu pawh sawiin Chief Minister chuan, an inunauna nghet leh tha taka a awm theih nan Mizoram mipui leh Myanmar unaute chu theihtawp chhuah tlang zui zel turin a sawm a ni.

He inkawmna ah hian Myanmar MP te chuan Mizoram in tha taka an lo dawnsawn a, mipuiin an lo tuamhlawm avangin lawmthu an sawi a. Sawrkar, tlawmngai pawl, zirlai pawl, Kohhran leh mipuiin an tana hma an lakna zawng zawng chu ropui tiin raltlan ang nilo, Inpui a lo lut ang mai an nih thu te an sawi a. Harsatna hrang hrang an tawhte leh thu pawimawh dang Chief Minister hnenah an thlen bawk a ni.

He inkawmna ah hian Chief Minister hi Mizoram State Planning Board Vice Chairman H. Rammawi leh OSD to CM Rosangzuala te chuan an tawiawm a ni.

Comments

Popular posts from this blog

Volleyball S/F khel dawn