Vanduaina tawkte zangnadawmna dilna ngaihtuah

The Mizoram Victims of Crime Compensation (Amendment) Scheme 2016 hnuaia Serchhip District atanga pawikhawihna thleng tuartu ten zangnadawmna an dil te ngaihtuah in nimin khan thutkhawm neih a ni.

Serchhip District Legal Services Authority (DLSA) buatsaiha he thutkhawm Serchhip District Court-a neih hi Serchhip Chief Judicial Magistrate leh DLSA-a Member Secretary Ngursangzuali chuan kaihruaiin thutkhawm koh a nih chhan leh he Dan in pawikhawihna thleng tuartu tana zangnadawmna pek dan tur ruahmanna a siam te a tarlang a, hemi hnu hian dilna lut te hi ngaihtuah chhunzawm nghal a ni.

The Mizoram Victims of Crime Compensation (Amendment) Scheme, 2016 dilna ngaihtuah tura ruat ah hian YMA, MUP leh Consumer Association aiawhte chu member ah telin DC leh SP te Ex-Officio member an ni bawk a, he thutkhawm ah hian member te an tel tha in kumin chhunga dilna lut 6 leh kum hmasa lama dilna lut la ngaihtuahna felloh 9, a vaiin dilna lut 15 ngaihtuah niin kumin a dilna lut ah 5 pawm a ni a, kum hmasa lama lut tawh 9 zingah 5 pawm ni bawkin nimin-a zangnadawmna pek tura an pawm hi a vaiin Rs. 21,50,000/- a ni.