Serchhip District-a Candidate sum hman dan enfiah a ni

Serchhip District chhung Assembly Bial hrang hranga Candidate te sum hman dan enfiahna hmasa ber chu nimin khan neih a ni a, he hun hi Serchhip District tana Expenditure Observer Umesh Chandrakant Phade IRS hova neih a ni.
Election Commission of India in Candidate ten inthlan kaihhnawiha sum an hman dan enfiah dan tur a ruahman angin nimin khan Serchhip District-a Candidate te sum hman dan enfiahna hmasa ber, First Inspection chu Serchhip DC Office-a Accounting Team Room-ah Expenditure Observer Umesh Chandrakant Phade ho hian neih a ni a, he hunah hian Serchhip District chhung Bial tina Candidate te Expenditure Agent te telin sum an hman dan uluk taka enfiah a ni a, sum an hman dan te felfai taka ziahfel niin tluang taka enfel a nih thu le lawmawm a tih thu Expenditure Observer chuan a sawi a. Accounting Team te leh Asst. Expenditure Observer te pawh an tel a ni.

Report atanga a lan danin Serchhip AC a Candidate 6 te chuan tun thlengin Rs. 7,47,305/- an hmang tawh a, Tuikum Bial-a Candidate mi 4 ten Rs. 6,70,585 hmang tawhin Hrangturzo Bial-a Candidate 5 ten Rs. 13,78,225/- an hmang tawh bawk a. Candidate mal-a sum hmang tam ber ni mek Lalroenga (INC, Hrangturzo) chuan Rs. 5,34,635/- hmang tawhin Lalremruata Chhangte (MNF, Hrangturzo) chuan Rs. 5,26,000/- a hmang tawh bawk a. Lalduhoma (ZPM, Serchhip) chuan Rs. 4,65,190/- a hmang tawh bawk a ni.

Serchhip District-a Candidate mi 15 te zingah Rs. 5000/- chauh la hmang mi pathum an awm a, heng te hi K. Vanlalruati (BJP Serchhip), Lalmalsawma (BJP Hrangturzo) leh Zaichhawna Hlawndo (Independent, Hrangturzo) te an ni.

Inthlanpui a Candidate te sum hman dan hi tum thum enfiah tura ruahman a ni a, a hnuhnung ber chu inthlanpui Vote chhiar hnua neih tur niin heta Expenditure enfiah duh lo chu Dan hmangin Inthlan chuh zui thei lo tura hrem theih an ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man