Vigilance Awareness Week

October 28 atanga November 5 chhung hian India rampumah ‘Vigilance Awareness Week, 2023’ hman leh mek a ni a, kumin Vigilance Week thupui tan hian'Hlemhletna hnawl la, ram tan thawk rawh' (Say no to corruption, commit to the Nation) tih chu hman a ni. Ramchhung hmundangte rualin nimin khan Mizoram-ah pawh 'Vigilance Week 2023' hawn nan Chief Secretary Dr. Renu Sharma kaihhruaina hnuaiah Mizoram Secretariat, MINECO-a sawrkar hnathawk, Officials and Staff zawng zawngten a huhovin 'Integrity Pledge' an chham rual a. Sawrkar Office tina Heads of Office-te pawhin an hnuaia thawk Officer leh Staff-te nen anmahni Office hmun theuhah 'Integrity Pledge' hi an chhamrual bawk a ni.

Integrity Pledge hmang hian sawrkar hnathawk tupawhin hlemhletna a do tlat tur thu te, sawrkar dan leh thupek anga dik leh felfai taka hnathawh a tum tur thu te, mipui rawngbawlna a ni tih hriain a nungchang leh hnathawh danah te mawihnai tak leh midangte entawn tlaka awm turin leh hlemhletna thil a hmuh emaw hriat te chu ngawih bosan mai lova, sawrkarah report ngei turin thu-tiam an chhamrual a ni.