Eiruk thubuai ah Court in thiamloh chantir

Aizawl District Court-a Special Judge (Prevention of Corruption Act) Dr. HTC. Lalrin-chhana chuan cheng vbc 1.06 tihchingpen thubuai ah Law and Judicial Department-a LDC (Muster Roll) thin Lydia Lalhruaitliangi chu thiamloh a chantir a, a hremna tur hi karleh Thawhtanni, Oct. ni 30-ah puan a ni ang.

Court thuremna-a tarlan a nih danin, he thubuai hi Law & Judicial Department-a Under Secretary Lalhlimpuii Hmar in ACB-a FIR a thehluh atanga irhchhuak a ni a. Lydia Lalhruaitluangi hian Law&Judicial Department-a a thawh hun chhung, December 2015 atanga August 2018 chhungin Department sum pai, a tam berah Sawrkar Ukil te hlawh tura tih hnuai atangin Office Bill lem te, Sanction Order lem te, a chunga thuneitute hming sign lemte leh Cash Memo lemte hmangin cheng vbc 1. 06 chu a nu leh pa te leh a laizawnte Bank Account-ah dah lutin sum tichingpen ah hian puh a ni.

Thubuai ngaihtuahna ah hian, Sawrkar lam thuhretu mi 24 te thu zawhfiah niin, lehkha leh tul dang pawimawh 308 phawrh a ni a; Hetianga thuhretute thu sawi leh lehkha pawimawh te ngun taka buk a nih hnuah Court hian Lydia Lalhruaitluangi hi Sawrkara a mawhphurhna ama tana hman-khawlohna chungchang ah te, a kuta mawhphurhna ama mimal tana hman khawlohna chungchang ah te, pawisa chungthu ah a chunglama thuneitute bumna chungchang ah te, inbumna tur atana lehkha lem siam ah te leh lehkha pawimawh lem a dik tak anga hmanna chungchang ah te thiamloh a chantir ta a ni.