Mizoram Secular Alliance ten Sakhaw zalenna duhtu Congress Party Candidate Vote turin an sawm
Nimin-a thuthar thehdarhtute an kawmna ah hian Mizoram Secular Alliance Chairman John Siamkunga chuan Mizoram Secular Alliance chu MPCC, ZNP leh Peoples Conference (PC) Party te thawkho an nih thu sawiin, India ramah Party lian pahnih awmin pakhat zawk chu BJP leh tualto party niin Hindu lalram din duhtu an nih thu a sawi a. Pakhat leh chu Indan National Congress (INC) niin anni hian an thawhpuite nen Sakhaw zalenna an duh a, an nih pahnih inbeihna karah Party tenau tam tak an awm thu a sawi a. India rama rorellai BJP chuan tun dinhmunah Lok Sabha-ah MP 332 neiin Uniform Civil Code (UCC) hmang thei dinhmun ah an ding teuh tawh hle tih sawiin, ramchhunga Hnam chi hrang hrang khawih tur a nih avangin tuna State awm zawng zawng zatve in an lo pawmpui a ngai a, tunah hian State 11 chu an thuhnuaia awm a nih thu leh tunhnaia State panga (5) inthlang turah hian pathum (3) an neih belh chuan UCC hi hmang thei nghal thei dinhmunah kan din thu an sawi a. Hei hi a hlauhawm avangin State pathum hi an neih belh lohna tura chechhuak an nih thu sawiin, India ramah Party lian tak pahnih inthen ah hian BJP chuan Hindu lalram din a tum laiin Congress chuan Sakhaw zalenna a duh thung avangin MLA inthlan lo awm turah hian Sakhaw zalenna duhtu Congress party lo Vote turin mipuite a ngen bawk a ni.
John Siamkunga chuan BJP in an lalram zauh tumin sum leh pai nen theihtawp in hma an rawn la dawn tih pawh thuthar thehdarhtute hmaah hian sawiin, “An nihna ang angin an rawn lang dawn lova, State danga a tih dan thin angin tuatto Party pahnih MNF leh ZPM a rawn hmang dawn,” a ti a, MNF leh ZPM Vote tute chuan in-direct in BJP an Vote dawn tihna a nih thu sawiin, The Forest (Conservation) Amendment Bill pass anih tak avangin mahni ramchhung ngei ah thu neihna kan nei thei tawh lova, heng BJP hmalakna thalo tak tak paih a thiat tur chuan Congress Party thlantlin a ngaih thu a sawi a, “Kristian ram kan nih reng theihna turin Zoram mipuite kan sawm a, theihtawp I chhuah ang u,” a ti bawk.
He hunah hian Mizoram Secular Alliance-a tel PC Party President Vanlalruata chuan India rama sawrkar mek BJP leh State hrang hranga an thawhpuite hian kan ram himna an ti derthawng mek nia sawiin, Politics lungphum pawimawh ber chu Ram leh Hnam leh Sakhaw himna a ni tih a sawi a. BJP thil tum ber chu India ram Hindu lalram a siam a ni tih sawiin, tunhnaia an hmalakna langsar zual zingah Uniform Civil Code (UCC) siam an tum chu Mizoram tan a thatloh thu a sawi a, “Kan ram himna a tichhia a, kan Hnam himna leh kan Sakhaw himna a ti derthawngin a ti nghing mek a ni,” a ti a, “India rampum huapin hma la theilo mah ila, Mizoram-ah tal chuan Hindu lalram hi din a nih loh nan MPCC, PC Party leh ZNP te chuan thawhhona an siam ta,” tiin an tum ber chu BJP leh an thurual puiten India rama Hindu lalram an din tur danchah a nih thu a sawi bawk.
Mizoram Secular Alliance-a tel ZNP President H. Lalrinawma pawhin MLA inthlan lo awm turah ZNP chuan Candidate neilo mah se Congress Party Candidate zawng zawngte chu an aiawha Candidate angah an ngaih thu a sawi a. Tualto party ten BJP hmalakna dodal tak tak turin awmzia an nei phaklo tih pawh sawiin, “A do thei leh vawthla theitu awmchhun chu Indian National Congress an ni,” a ti a. Kan Hnam leh Sakhaua a him hmasak loh chuan thil pawi tak thleng thei a nih thu avanga Congress Party thlawp an inh thu a sawi bawk.
Comments
Post a Comment