Inthlanna fel fai, thianghlim leh huapzo nei turin General Observer in thawhhopui ah a sawm

Election Commission of India in Mizoram Assembly Inthlanpui neih tura Serchhip District-a General Observer tura a ruat V. Sampath IAS chuan inthlanna fel fai, thianghlim leh huapzo a awm theih nan thawhhopui ah he Inthlanna a Candidate leh an aiawhte chu a sawm.

Mizoram Assembly Inthlanpui neih tura Serchhip District chhung Assembly Constituency pathum (3)-a Candidate hrang hrang Agent te chu nimin khan Serchhip DC Meeting Hall-ah kohkhawm niin Inthlanpui neih tura inbuatsaihna kal mekah hriatthiam loh lai inhrilhfiahna leh Election Commission of India in zawm ngei ngei tura dan a siam hrang hrang te inhrilh nawn a ni a. He hun hi Serchhip District tana General Observer V. Sampath chuan hmanpuiin he huna Political Party leh Independent Candidate aiawh kal zawng zawng te chu inthlanna fel fai, thianghlim leh huapzo a awm theih nan thawhhopuiah a sawm a. Chan tha bik leh duhsak bik awmlo a intluktlanga Candidate tin ten he Election hi an hmachhawn theihna turin Election Commission of India chuan Mizoram pawn atangin Officer te Observer turin a tir thin tih sawiin, he huna kalkhawm Candidate hrang hrang Agent te chu hriatthiam loh leh zawhna an neih apiang ama hnenah zawhfiah theih a nih thu leh Serchhip Election Office a thawktu te pawh englai pawha an zawhfiah reng theih thu a sawi bawk a ni.


Serchhip District chhunga Assembly Constituency pathum-a Candidate Agent te tana Training neih hi Serchhip District Bawrhsap leh District Election Officer David Lalthantluanga chuan kaihruaiin 28-Hrangturzo (ST) AC-a RO Lalnundika leh 27-Tuikum (ST) AC-a RO HD. Lalpekmawia te chuan Model Code of Conduct (MCC) leh Expenditure vawn dan tur chungchang an sawifiah a. 26-Serchhip (ST) AC-a ARO Rebecca Laldinmawii Hrahsel chuan inthlan kaihhnawiha Candidate te leh an Agent ten an hriattur pawimawh langsar zual a sawifiah bawk a. Media Certification and Monitoring Committee (MCMC)-a Member Secretary leh Serchhip DIPRO Lalnunmawii chuan Pamphlet, Banner leh Flag tar phalna dil dan leh Electronic Media kaltlanga Political Advertisement tihchhuah phalna dil dan leh kalphung te a sawifiah bawk a ni.

Nimin-a he Training-ah hian Serchhip District chhunga Candidate hrang hrang Agent te an tel tha hle a, zawhna leh channa hun te hman niin Serchhip Election Officer Lalrinsanga Hnamte chuan lawmthu sawiin Training hi tihtawp a ni.

Mizoram Assembly Inthlanpui neih turah hian tarlan tawh angin Serchhip Bial-ah Candidate mi 6 awmin Tuikum Bial-ah mi 4 leh Hrang-turzo Bial-ah mi 5, an vaiin mi 15 an awm a, tunah hian Candidate leh Political Party te chuan Vote zawn hna ngawrh takin an thawk mek a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar