Serchhip District-ah Candidate inhnukdawk awm lo in EVM hman tur leh Polling Official thlan fel an ni

Serchhip District chhunga Assembly Bial pathum chuh tura hming pelut zingah inhnukdawk awm lovin Candidate mi 15 an awm dawn ta a. Nimin khan Polling party Second Randomization neih a nih bakah EVM hman turte tifelin Randomization neih nghal a ni bawk.

Thla thar November 7-a Mizoram Assembly Inthlanpui neih tura chuh tura hming pelut te tana inhnuhdawh theih hun hnuhnung ber nimin tlai dar 3:00 thleng khan Serchhip District-a Candidate zingah inhnukdawk an awm lo a, heti hian Serchhip District chhunga Assembly Bial pathum (3) chuh turin Candidate mi 15 an awm ta a. 26-Serchhip (ST) AC-ah Candidate mi 6 awmin 27-Tuikum (ST) AC-ah Candidate mi 4 leh 28-Hrangturzo (ST) AC-ah Candidate mi 5 an awm a ni. Political Party hrang hrang zingah INC, MNF leh ZPM te chuan Bial pathum ah hian Candidate nei kim vekin BJP in Bial pahnih an chuh dawn a, Independent-a chuh tur mi 4 an awm bawk a ni.


Serchhip District chhung Assembly Bial hrang hranga ding turte hi 26-Serchhip (ST) AC-ah K. Vanlalruati (BJP), R. Vanlaltluanga (INC), J. Malsawmzuala Vanchhawng (MNF), Lalduhoma (ZPM) leh Independent-a ding tur Lalawmpuia Renthlei leh RamhlunEdena te an ni a. 27-Tuikum (ST) AC-ah candidate mi 4 awmin TT. Zothansanga (INC), Er. Lalrinawma (MNF) leh PC. Vanlalruata (ZPM) bakah Independent-a ding tur C. Lalrinmawii te an ni. 28-Hrangturzo (ST) AC-ah Lalmalsawma (BJP), Lalroenga (INC), Lalremruata Chhangte (MNF), Lalmuanpuia Punte (ZPM) leh Independent-a ding tur Zaichhawna Hlawndo te an ni bawk.

Hetianga inthlanpui neih tura hming pelut te tana inhnuhdawh theih hun khar a nih hnu nimin tlai khan EVM leh VVPAT Randomization tum hnihna leh Polling Party Randomization tum hnihna chu Serchhip District-a Election Observer (General) V. Sampath hoin Serchhip DEO Office Video Conference Hall-ah neih a ni a. He hunah hian RO leh ARO bakah Political Party aiawhte telin EVM Management System kaltlangin EVM leh VVPAT 2nd Randomization hi neih a ni a, 1st Randomization-a Assembly Bial hrang hranga hman tur EVM leh VVPAT thliar fel tawh atangin EVM leh VVPAT te chu a hmanna tur Polling Station theuh thliar fel niin EVM leh VVPAT 88 bak zawng chu thlaveng-ah dah a ni ang.

Nimin veka Polling Party 2nd Randomization neih ah hian Polling Party pakhat-a awm tur Presiding Officer leh Assistant Presiding Officer pakhat ve ve bakah Polling Official 2 te chu khawl hmanga thliar fel an ni a, Serchhip District-a Polling Station 88 atan hian Polling Party 107 awmin heng zinga 88 te hi Inthlan Vote thlak hma ni-ah an kalna tur thlan fel an ni dawn a, a dang zawng te chu thlaveng-ah Vote thlak zawhfel hma zawng chuan an awm dawn thung a. Polling party tinah hian venhimna hna thawktu tur dah tel an la ni leh dawn bawk a ni.

Nimin-a Randomization neih ah hian Randomization neih dan kalphung leh ECI software hman a nih thu te DEO David Lalthantluanga chuan a sawi a. EVM Nodal Officer Lalhruailiana Zote pawhin randomization neih dan sawiin District thuneituten anmahni duh zawng thlan leh rem lo ruat ve te a theih loh thu leh, khawl hmang veka polling party te kalna tur leh EVM/VVPAT khawl kalna tur te pawh herchhuah a nih thu a sawi a ni.

Mizoram Assembly Inthlanpui neih tur atan hian chawlhkar hnih (2) chiah Vote thla hmain hun a awm tawh a. Hei vang hian sawrkar lam inbuatsaihna chuan a vawrtawp thleng mekin Political Party te pawhin tan an la mek a. Tun thlengin khawi atang mahin he inthlan tibuai thei boruak thleng hriat tur a awm rih lo a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man