YMA Inkhawmpui Lian vawi 74-na neih mek a ni

YMA Inkhawmpui Lian vawi 74-na chu Biate-ah neih mek niin Vawiin hian Central YMA hruaitu tur thlanna neih a ni anga, zanin hian Inkhawmpui hi a tiak dawn a ni.

Nizan hmasa atanga Zialung Run, Biate a YMA Inkhawmpui Lian neih ah hian nimin khan Khawmpui Palai mi 1579 te chuan ro relin YMA khawihah Agenda paruk (6) tre chu pawm a ni a, heng te hi Environment humhalhna kawngah Central YMA in tun aia chak zawkin hma la rawh se tih te; Hmun hrang hranga awm Zofate kan inpumkhat lehzual theih nan tun aia chak zawkin Central YMA in hma la rawh se tih te; Social Audit hi tha zawka kalpui a nih theih nan leh Mipuiin kan hlawkpui theih nan hmalak ni rawh se tih te; YMA-ten sawrkar Department kan thawhpuite zirchian a, thawhpui awm chauh thawhpui tawh ni se tih te; Environment Clearance tel lo chuan Mizoram chhungah hmasawnna hnathawh a nih tawh loh nan Central YMA-in hma la rawh se tih leh Tuihna humhalh kawngah YMA-in uar zawk leh nasa zawka hma lak ni rawh se tih te a ni a. Sawrkar Khawih Agenda pahnih lut zingah Quality Education a awm theih nan sawrkarin tun aia chak zawkin hma la rawh se tih chu pawm niin Armed Battalion pakhat tal sawrkarin din belh leh rawh se tih erawh pawm a ni ta lo thung.

YMA Inkhawmpui Lian Rorel inkhawm hian Chhiatni Thatni Inkaihhruaina an hman lai chu ennawn relin YMA Kumpuan Thupui atana rawtna lut pahnih zingah 'Ram leh hnam humhalh' tih chu thlan a ni a. Kum 2025 YMA Inkhawmpui Lian chu Sakawrdai-ah neih tura pawm a nih bakah kum 2023-2024 Budget atan Rs. 2,01,11,760/- chu pawm a ni bawk.

Report atanga a lan danin tunah hian YMA member 4,90,601 awm mekin heng te hi mipa 2,86,858 leh hmeichhia 2,03,743 an ni a. Central YMA hnuaiah Branch 819 awm mekin, Group YMA 50 leh Sub-Hqrs. YMA 8 an awm mek bawk a. YMA hruaitu hlun chawimawina dawng tawh mi 3,119 awmin tun tum inkhawmpui lian-a dawng tur mi 155 an awm bawk a ni. Central YMA-in CADS a din thar leh atanga tun thla ni 11 thleng khan Heroin (No.4) Hawng 2,240 an man tawh a. Methamphetamine mum 1,0188; Alprozelum mum 2,695; Tramator mum 51,279; Pseudoephedrine gram 182; Ganja Kg 4 leh fun 80 leh Khuh damdawi Um 3,170 an man tawh bawk a. September ni 9, 2022-a Central YMA-in CADS a din thar leh atanga an ruihhlo man hlut zawng hi tualchhung rate a chhutin Rs. 34,59,92,356 a tling a ni.

Vawiin hian kum 2023-2025 chhunga Central YMA hruaitu tur thlanna neih leh a ni anga, zan lamah Palai thlahna hun hmangin YMA Inkhawmpui Lian hi a tiak dawn a ni.