Assembly Inthlanpui atana Nomination lut te pawm vek niin Vawiin thleng inhnuhdawh theih a ni

Mizoram Assembly inthlanpui lo awm tur chuh tura mi 174 te Nomination paper thehluh chu pawm vek a ni a, Vawiin tlai dar 3:00 thlengin inhnuhdawh theihna hun hawn a ni ang.

Mizoram Assembly Inthlanpui chuh tumte tan hian Zirtawpni tlai dar 3:00 thleng khan Nomination paper thehluhna hun hawn niin heng te hi Inrinni khan enfiah nghal a ni a, CEO Office atanga thudawn danin, Lawngtlai East-a ZPM Candidate tura hming pelut Dr. Lorrain Lalpekliana Chinzah Nomination paper-a proposer zinga pakhatin a hming a sign lova, hei vang hian thutawp siam theih ni lovin a dang zawng 173 te chu pawm vek a ni a. Nimin khan Lawngtlai East bial chuh tuma hming pekluh zawng zawng te hi endik nawn leh niin hetah hian hming ziah hnan ve lo JH. Thangliana chuan candidate hi a pawm loh vang nilovin, tih hmaih palh a nih thu a sawi a, Returning Officer hoin uluk zawka endik a nih hnuah pawm a ni ta a ni. 

Mizoram CEO Office atanga thudawn danin, Aizawl District-ah Assembly bial 12 chuh turin mi 55-in nomination an file a, Lunglei District-a Assembly bial 6 chuh turin mi 27 ten Nomination File in Champhai District-a bial 3 chuh turin mi 10, Kolasib District-a bial 3 chuh turin mi 13, Serchhip District-a bial 3 chuh turin mi 15, Lawngtlai District-a bial 3 chuh turin mi 13, Mamit District-a bial 3 chuh turin mi 14 leh Saitual District-a bial 3 chuh turin mi 11 an awm a, Siaha District-a Assembly bial 2 chuh turin mi 9-in hming an pekluh bakah Khawzawl District-a bial pakhat chuh turin mi 4 leh Hnahthial District-a Assembly bial pakhat chuh turin mi 3 an awm a ni.

Heti hian rorellai MNF Party bakah Congress Party leh ZPM Party te chuan Assembly Bial 40-ah Candidate 40 theuh an nei a, BJP chuan Candidate 23 neiin AAP-in 4 an nei bawk a, Independent Candidate 27 an awm bawk a ni. Tun tumah hian inthlan chuh tura hming pelut mi 174 zingah hian Hmeichhia mi 16 an awm bawk a, heng mi 16 te hian Bial 18 an chuh dawn a, Hmeichhe Candidate 16 zinga 7 te hi Independent-a chuh tur niin Hmeichhe Candidate hi Inthlan hnuhnung ber kum 2018 ai khan pahnih in an tlem zawk a, kum 2018 MLA inthlanpui ah khan Candidate 209 awmin an zinga 18 chu hmeichhia an ni.

Assembly inthlan hnuhnung ber, kum 2018-ah khan National People's Party (NPP) leh Nationalist Congress Party (NCP) bakah Mizoram tualto party PRISM te'n an chuh a, tun tumah erawh chuan he'ng Political party te hian an chuh ta lo thung a. Ram pum huap party atana Election Commission of India-in a puan thar AAP hian tun hi Mizoram inthlan an chuh hmasakna ber a ni thung.

Comments

Popular News (Last 30 Days)

Vawiin-ah HSSLC Exam result

LPG man bithliah thar