State thenawm leh ram thenawm pawh tur kawngpui cheng vbc. 20,000 sengin thawh tum

Union Minister for Road Transport and Highways Nitin Gadkari chuan Mizoram District 9 chhun tur leh State thenawm leh ram thenawm pawh tur kawngpui sial hna chu cheng vbc. 20,000 sengin nakum atanga thawh tan a ni dawn tih sawiin, Ramchhung mitin hmasawnna thlen theitu chu BJP chauh a nih thu a sawi bawk.

Mizoram Assembly Inthlanpui neih tura Dampa Bial-a BJP Candidate Vanlalhmuaka tana campaign mek Union Minister Nitin Gadkari hian nimin khan West Phaileng-a Vantlang Inkhawm-ah he thu hi a sawi a, heng kawngpui siam turte hian District 9 a tlawhpawh dawn bakah Manipur, Nagaland leh Myanmar a pawh dawn niin a sawi a. Kum 2014-a he Ministry a chan hlim khan National Highway hi KM 986-a thui a nih thu leh kuminah chuan KM 1,478-a thui a nih tawh thu sawiin, Minister a nih hnuah Mizoram-ah kawngpui KM 355 a thui siamna atan cheng vbc. 8,000 hman a nih tawh thu bakah Mizoram chhunga kawngpui KM 944 a thui siam tura cheng vbc. 20,078 ruahman a nih tawh thu a sawi a, cheng vbc. 20,000 senga kawngpui KM 750 siamna turin DPR peihfel a nih tawh thu a sawi bawk.

Union Minister chuan District 6 paltlang Aizawl leh Tuipang inkar National Highway kawng siam that hna chu cheng 7,361 sengin kum thar ah zawhfel tum a nih thu a sawi bawk a. Aizawl khawpui pumpelh kawng (by-pass road) lei hnuai KM 2 leh chanve verha kawng KM 34 siam nan cheng nuai 2,500 ruahman hna kal mek chu kum 2025 a zawh hman tura a ruahman a nih thu a sawi a. Hei hian Aizawl khawpui chhunga lirthei tawt lutuk chu a ti ziaawm dawn a ni, a ti a. Cheng vbc. 1,132 senga siam Kaladan Multi Modal Transit Transport Project chu kumin November hian zawhfel beisei a nih thu pawh sawiin, he kawng hian Myanmar-a Sittwe lawng chawlhhmun a pawh dawn a ni thu a sawi a ni.

Heng bakah hian Silchar leh Vairengte inkar kawng siam zauhna atan cheng vbc. 3,500 chu nikum kan sanction tawh a ni na in ram lak chungchangah Revenue leh Forest Department inkarah thu inhmu lo a awm avangin sawrkarin kawngpui siam zauhna tur ram a tifel thei lova, chu chuan he hna thawh hun hi a pawt khawtlai tih a sawi a. Zorinpui leh Longmasu inkar kawng siam hna atan pawh cheng vbc. 790 pek ni tawh mah se, tihkhawtlai a ni tih sawiin, Mizoram-ah BJP a sawrkar chuan hei hi chinfel a ni ang tih a sawi bawk.

Kuthnathawktute tana remchang leh awlsamna siamsak chu a ngaih pawimawh a nih thu leh an party chuan hmarchhak pumpui chu ei leh bar lamah nasa taka tih hmasawna tih danglam a tum niin a sawi a, Mizorama hmasawnna ruhrel chu khawvel pum huap Standard anga siam an tum thu sawiin, ramchhung mitin hmasawnna thlen theitu chu BJP chauh niin a sawi a, mitin thleng phak Lotus ruahmanna hmangin chhungkaw tin ei leh bar kawnga chawikan an tum thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar