Mahni fa pathum pawngsualtu kum 21 tang turin hrem

Lunglei District-a Special Judge (POCSO Act) chuan mahni fanu pathumte pawngsual thintu Lawngtlai District chhung khaw pakhat-a mipa kum 46 mi chu thiamloh chantirin kum 21 tang turin a hrem.

Nimin a Court in a hrem tak mipa kum 46 mi te chuan nikum khan a fanu kum tlinglo mi pathum, kum 7, kum 10 leh kum 12 mi te chu an nu awmloh hlanin a pawngsual thin tih hriatchhuah a ni a, pawngsual tawk naupang pathumte hian an nu hnena hemi chungchang tum thum an sawi hnuah August 5, 2022 khan Lawngtlai Police Station-ah FIR thehluh a ni a, a hnu August 9-ah Police-te'n pawngsualtu hi an man zui ta a ni.

Thubuai hi hun engemaw chen ngaihtuah a nih hnuah Special Judge (POCSO Act) nimin khan thutlukna siamin, Section 6 POCSO Act hnuaiah kum 20 tang tur leh section 506 IPC hnuaiah kum khat tang turin a chungthu rel sak a ni a. Hei bakah hian Court chuan Rs 10,000/- chawi turin a hrem bawk a; pawisa chawi tur hi a pek theih loh chuan ni 20 dang a tan belh ang. (Pawngsual tawk te nihna tilang thei a nih avangin pawikhawihtu hming leh khua hi thup rih a ni)