Tha thlah loh chuan hlawhtlinna chan ngei beisei

Serchhip Bial-a MNF Party Candidate J. Malsawmzuala Vanchhawng chuan inthlanpui an hmachhawn tura hun tlem an la neih ah tha thlah lova theihtawp an chhuah chuan hlawhtlinna an chan ngei a beisei thu a sawi.
MNF Party in nimin a Serchhip Mizo Hnam Run-a Chhung Inkhawm an neih ah Assembly Inthlanpui neih tura MNF Candidate J. Malsawmzuala Vanchhawng chuan Serchhip bial chhung MNF Party boruak chu a tha hle tih sawiin, Tu emaw thawh rah emaw ni lovin an inlungrualna leh inpumkhatna chu chung lamin a thawh sak a ni tih a chiang niin a sawi a. Chutihrual chuan inthlan an hmachhawn turah chawlhkar hnih chhung hun an la neih thu sawiin, tha thlah hauh lova theihtawp an chhuah zel chuan hlawhtlinna an chan ngei a beisei thu a sawi a ni.

MNF Adviser J. Malsawmzuala chuan MNF Party chu kan ram, kan hnam leh kan Sakhua a himna tura Zofate tana din a nih thu pawh sawiin, Over-ground-a an lo awm tak hnuah pawh MNF Party chu Sakhaw tih bik nei an nih thu a sawi a. Kum 1961-a MNF party a lo din pawh khan a tum ber chu Kristian sakhua vawnhim a nih thu leh Kristian Sakhua nektu apiang chu na taka nektu awmchhun a nih thu a sawi bawk.

Nimin-a MNF Party Chhung Inkhawm hi an Block President H. Lalthianghlima chuan kaihruaiin Serchhip MNF Block President hmasa ber R. Thanchuanga pawhin thu a sawi bawk a ni.