Ni 2 awh tur Anthurium Festival hman tan a ni

Anthurium Festival, 2023 chu nimin khan Reiek Tourist Resort-ah hman tan niin Tourism Department changtu Secretary Dr. Lalrozama IAS chuan khuallian niin a hmanpui a ni.

Nimin-a he Festival hawnna hunah hian khuallian chuan Anthurium Festival chu kan hnam nunphung leh ziarang khawvel hmuha kan phochhuah ve theihna anih angin Festival chhimtu zawng zawngte chu kan hnam rohlu leh ziarangte ngaihlu zual tura tan la thar theuh turin a sawm a. Tourism chu eizawnna tha tak a nih thu sawiin, khualzinte chu mi hausa an ni tlangpui a, kan ram mawina leh kan ramngaw chhunga cheng ramsate, kan ram sik leh sa nuam tak chhim tur hian an rawn kal fo tawh thin a. Nasa zawka Tourist kan hip lehzel theihna turin mitinin kan ram hi duat taka kan enkawl a ngai a ni, a ti.

He hunah hian Pachhunga University College-a Chhawkhlei Cultural Club, Govt. Hrangbana College-a Zunleng Cultural Club leh Govt. Middle School, Reiek te'n Mizo Hnam lam an entir bakah MHIP Reiek te'n Traditional Parade an entir a. Zaithiam zai hrang hrang ngaihthlak anih bakah Stunt Show, Mit titlai tak tak thlirho a ni. Hei bakah hian Anthurium Festival pual hian Stall hrang hrang siam niin SVEEP Stall pawh siam a ni a. ‘Vote ka thlak ngei ang’ tih intiamkamna signature board siam a ni bawk.

Anthurium Festival hi kum 2006 atang khan hman tan niin rokhawlhna avanga kum 2/1 hman loh zeuh bak chu kumtin hman thin a ni a. Kumin a Anthurium Festival hman mek hi Vawiin hian chhunzawm-a zawhfel tur a ni ang.