Police an duty laia hmelma kut-a thi te sunna hun Serchhip-ah hman a ni
Serchhip SP Office Tual-a 'Police Commemoration Day' pual-a hun hman ah hian Serchhip SP, MS. Dawngkima chuan Police an duty laia hmelma te laka nunna chan te sunna leh zahna hlanna atan kumtin October 21-ah 'Police Commemoration Day' chu hman thin a nih thu leh he ni hi Police te tan chuan theihnghilh theih a nih loh thu a sawi a. He ni hi Police-a an thawhpui, India ram hmun hrang hranga Uniform an hakpui te, Police hna, ram venhim hna, Security Force an nihpui te an Duty laia vanduaina tawka nunna chan te hriatrengna tan an hman thin thu leh ramchhung hmun hrang hranga Police te awmna hmunah hman thin a nih thu a sawi a. September 1, 2022 leh August 31, 2023 inkar-a ramchhung State hrang hranga Police an Duty laia hmelma kut-a thi mi 188 an awm thu a sawi bawk.
He hunah hian Serchhip SP chuan Inthlanpui kan hmachhawn tur chungchang pawh sawiin, tunah hian inbuatsaihna atan chawlhkar hnih vel chauh kan neih tawh thu a sawi a, hei vang hian Police te chu Serchhip District-ah inthlanna muanawm tak leh zalen taka kan neih theih nan an theihtawp an chhuah tawh anga an chhuah chhunzawm zel a pawimawh thu a sawi a. Inthlanpui chu kum 5 dan-a vawi khat thleng a ni tih sawiin, an hna thawh zelna tura tawnhriat pawimawh tak a hmang thiam turin a chah bawk a. Hemi hnu hian Police an duty laia nunna chan ta te sunna hun hman zui nghal a ni.
British hunlai atang tawhin India Police te hian Tibet leh India inrinna lai bawr mel 2500 zet an veng thin a, October ni 21, 1959 khan mahni ram venghim tura hnathawk (duty) mek India Police, Karam Singh, DCIO leh a hote Police mi 20 rual chu Aksai Chin pela ralthuam famkim nena rawn lut ru China sipai rualte chuan Hot Springs (Ladakh)-ah lambun in Automatic Rifle leh Grenade hmangin an lo bei a. A hmunah mi 10 thiin mi 7 chu hliam na tak tuarin China sipaite chuan an man a. Heng ram tana nunna chan te ruang hi China sipai chuan 13th Nov. 1959-ah India kutah hlanin Ladakh-a Hot Spring-ah chawimawina famkim nen halral an ni ta a ni. Hemi hnu kum 1960 atang chuan 21st October chu 'Police Commemoration Day' atana ruat niin kumtin Police ram tana nunna hlante hriatrengna, sunna leh chawimawina hun atan an hmang ta thin a. Kumin hian Mizoram-ah Police an Duty laia nunna chan hi an awm lo thung a ni.
Comments
Post a Comment