Kum 4 tang tur leh cheng vbc. 1 chawi turin hrem

Aizawl District Court-a Special Judge (Prevention of Corruption Act) Dr. HTC. Lalrinchhana chuan kar kaltaa cheng vbc. 1.06 tihchingpen thubuaia thiamloh a chantir Law and Judicial Department-a LDC (Muster Roll) thin Lydia Lalhruaitluangi chu kum 4 chhung tang tur leh cheng vbc. 1 chawi turin a hrem a. Pawisa hi a pe lo a nih chuan kum 50 a tan belh ang.

Special Judge (Prevention of Corruption Act) hian nimin khan Lydia Lalhruaitluangi hremna hi puangin sawr-kar-a a mawhphurhna ama tan a hman khawlohna avangin Prevention of Corruption Act, 1988 section 13 (1) (a), (b)/13(2) hmangin kum 4 Jail tang tur leh cheng nuai 20 chawi turin a hrem a. A kuta mawhphurhna ama mimal tana hman khawlohna avanga thiamloh a chantirna ah Indian Penal Code (IPC) Section 406 hmangin kum 4 Jail-a tang tur leh cheng nuai 20 chawi turin a hrem bawk.

Heng bakah hian pawisa chungthu ah a chunglama thuneitu te a bumna avangin IPC section 420 hmangin kum 4 Jail tang tur leh cheng nuai 20 chawi turin a hrem bawk a. Inbumna tur atana lehkha lem siam kaihhnawih ah IPC section 486 tlawhchhanin kum 4 tang tur leh cheng nuai 20 chawi turin a hrem bakah Lehkha pawimawh lem a dik tak anga hmanna chung-changah IPC 471 tlawhchhanin kum 4 tang tur leh cheng nuai 20 chawi turin a hrem bawk a ni.

Lydia Lalhruaitluangi hi tunhma lama thubuai la nei lo leh fate enkawltu a nih angin a vaiin kum 4 tang turin Court chuan a rel sak a, a pawisa chawi tur erawh hi chu a pangngai-in a kal thung ang. Zirtawpni a Special Court-in thiam loh a chantir tak Lydia Lalhruaitluangi hi Jail-ah thawnin nimin khan Court-ah hian hruai a ni a, nimin vek khan Central Jail-ah thawn leh nghal a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man