Governor in Lamp Lighting leh Graduation hmanpui

Mizoram Governor Dr. Hari Babu Kambhampati chuan nimin khan Nursing College, RIPANS in B.Sc zirlaite puala Graduation leh Lamp Lighting vawi 23-na a buatsaih chu Woodland Hills, Zonuam-ah a hmanpui.

Nimin-a he hun hmanna ah hian Governor chuan eizawnna satliah mai ni lo, rawngbawlna leh hna zahawm nikawp Nurse zirna bultanna atana khawnvar chhi a, thutiam la thar te chu a lawmpui thu sawiin, B.Sc Nursing zirchhuak tharte pawh an hna thawhna turah leh an kal zelna turah duhsakna a hlan a. Nursing leh Healthcare Service chi dangah te India hmarchhak thalai ten talent ropui tak an nei bik nia sawi a nih thin thu sawiin, a bik takin Mizo Nurse te chu India ram hmun hrang hrangah pawh fak hlawh ber pawl an ni tih a sawi. Governor chuan Mizo Nurse zirchhuak zingah India ram pawnah hnathawk an pung zel chu lawmawm a tih thu sawiin, RIPANS chu hemi kawngah hian Nursing Institution dangte tluk loh a ni mek a; placements records duhawm tak a nei mek a ni, a ti. Governor chuan RIPANS hotute fakin India hmarchhak bikah phei chuan Healthcare Sector bikah RIPANS chuan hna ropui tak a thawk a ni, a ti bawk.

Nimin-a he hun hmanna ah hian RIPANS Director Prof. Sanjay D. Sawant chuan RIPANS hnathawh dan tlangpui tarlangin, First Semester ten Synod Hospital-a Nursing Superintendent C. Thankhumi kaihhruaina hnuaiah Lamp Lighting & Oath an nei nghal a. Hemi hnu hian Citation leh Proficiency Award sem niin Nursing Graduate te chuan Prof. Sanjay D. Sawant, Director, RIPANS hnen atangin Citations an dawng a. Zirlai titha zual te chuan Governor Dr. Hari Babu Kambhampati hnen atangin Proficiency Awards an dawng thung a ni.