Inthlanpui atana inbuatsaihna CEO hova thlirho a ni

Thla thar November ni 7, 2023-a Mizoram MLA inthlanpui neih tur atana inpuahchahna te chu nimin khan Chief Electoral Officer (CEO) Mizoram Madhup Vyas IAS kaihhruaiin CEO Office-ah thirlho a ni.

He thutkhawm ah hian Mizoram CEO Madhup Vyas chuan Inthlanpui langtlang, felfai leh hlawhtling taka buatsaih a nih theih nan thawhhona tha tak chhawmnun zel a tul thu leh hmalakna te inhriatpawh tawn zel a tul thu a sawi a. Election chu thil dang zawng aia ngaihpawimawh hmasak tur a nih thu leh inpuahchahna tithuanawp thei thilte awm lo tura tanlak tlan a tul thu a sawi a. Inthlan kaihhnawiha inhnamhnawih zawng zawngte theihtawp chhuah zel turin a chah bawk a ni.

He hunah hian kumin inthlanpui lo awm tur atana Sawrkar Department hrang hrangte inbuatsaihna leh hmalakna hrang hrangte thlirho niin, hmabak la awmte hun bituk chhung ngeia zawh hman a nih theih nan tanlak nise tih a ni a. Mizoram chhunga Assembly Constituency 40-ah Polling Station 1,276 a awm thu tarlan niin, hmanraw mamawh leh awm ngei ngei tura tih Assured Minimum Facilities (AMF)- Electricity, Inthiarna, Tui in tur, Wheelchair lawn theihna (ramp) leh Furniture chhawpchhuah kawnga hmalakna te thirlho a ni a. October ni 17, 2023 thleng khan hengte hi Mamit, Aizawl, Saitual, Khawzawl, Kolasib, Champhai leh Hnahthial District-ah te ruahman fel tawh a nih thu tarlan a ni. 

Heng bakah hian Polling Official leh Central Armed Police Forces (CAPF) personnel-te veivah zung zung theihna tura inkalpawhna siam that ngai te, Emergency Air Ambulance ruahman dan tur te, sum dinhmun tlangpui leh Dan leh thupek kenkawh chungchang te, Vohbik (PwD) te tana Benchmark Disability Certificate pekchhuah leh CAPF tana ruahmanna siamte thlirho a ni bawk a. Tun dinhmunah PwD voter 3,300 awm zingah Benchmark Disability Certificate pekchhuah 691 an awm thu leh CAPF Company 20 te'n Mizoram an rawn thlen tawh thu tarlan a ni a, ruihhlo leh a kaihhnawih man chungchanga hmalak dante pawh thlirho a ni bawk.