Damlo kanna sum chheprelh ngei niin hria

MNF Media & Publicity hruaitute chuan ZPM Chief Ministerial Candidate leh Serchhip bial MLA ni mek Lalduhoma'n MLA Fund atanga damlo kanna atan sum a chheprel ngei nia an hriat thu an sawi.

Nimin-a Aizawl Press Club-a thuthar thehdarhtute an kawmna ah MNF Media & Publicity General Secretary VL. Krosshnehzova chuan, Serchhip MLA Lalduhoma hian MLA Fund atangin, kum 2021-2022 chhung lekin damlo kan nan Rs. 16,42,000 a hmang tih sawiin, a sum hman hi a dik ngei em tih an chhui hnuah thil dik lo inphum a awm ngei a ni tih a sawi a. MLA Fund hmanna Lalthanmawia Hauzel, New Serchhip-in RTI hmanga a dilna chhanna nikum December ni 22-a a lan danah Lalduhoma hian Zoremsangi, Serchhip Dinthar chu ‘Grant in aid for Health Purpose’ atan Rs. 2,50,000 a pe angin a inziak a, Lalduhoma hian Rs. 1000 bak a pek loh thu Zoremsangi te nupa chuan Serchhip MNF hruatitute an hrilh tih a sawi a ni. MNF Media & Publicity hruaitute chuan Lalduhoma’n a bial-a dam lo a kanna tur Rs. 2,49,000 a tham then sak duh mai chu mak an tih thu sawiin, MLA zin loh bill a lak, hriatchhuah tak avanga a kir leh ang khan damlo kanna sum a lo chheprelh hi a dam lo kan tur Zoremsangi hi pe vat turin an ngen tih an sawi bawk.