Inthlan vuakvet-a Internet leh Social Media a thu thehdarh te uluk taka vil reng a ni

Mizoram Assembly Inthlan puan atanga zawhfel ni thlengin Internet leh Social Media kaltlanga thu thehdarhtuin Model Code of Conduct (MCC) a bawhchhia em tih chu Media Certification and Monitoring Committee (MCMC) leh Social Media Team ten uluk takin an vil.

Hemi chungchanga Media Cell, CEO Office in Social Media platform hrang hrang hmangtute tana hriat leh zawm tur inkaihhruaina (Advisory) a tihchhuah a tarlan a nih danin Social Media chu Electronic Media huang chhunga rinluh a nih avangin politics rawngkai Advertisement reng rengte ngun taka vil a nih avangin a hmangtute pawh kan fimkhur tlan a tul thu tarlan a ni a. Social Media ven a pawimawh em avangin kum 2019 February thla khan MCMC Member atan Social Media Expert dah belh a nih thu leh Social Media kaltlanga Political Advertisement tihchhuah tur reng reng chu Electronic Media dangte ang bawkin ECI-in a din MCMC hnenah chhuah phalna (pre-certification) dil hmasak zel tulin Contesting Candidate/mimal tan District Level MCMC-ah dil tur a ni a, political party/pawl a awm tan State Level MCMC-ah dilna thlen tur a ni.

Candidate leh Political party ni lo, mi dangin Social Media kaltlanga Political Advertisement pre-certify loh an tihchhuah chuan Commission-in Ministry of Communication and Information Technology rawn chungin hmalak dan tur a ngaihtuah anga, Mimal hminga awm Social Media Account leh Website-a politics rawngkai message/comment/photo/video post/upload-te chu Political Advertisement anga chhiar a ni lo thung a, Pre-Certification pawh tih a ngai lo a. Candidate/Political Party-ten an post chhawng a nih pawhin Political Advertisement anga chhiar a ni lo a. Model Code of Conduct (MCC) te, ECI thuchhuah leh Court thupek te a kalh loh nan a hmangtute an fimkhur thung tur a nih thu an tarlang bawk.

Hetihrual hian Social Media hmangtu ten ramdang rorelna sawiselna te, hnam, chibil leh Sakhua anga inhuatna chawkchhuak thei thil te, hming hmerha midang beihna leh tawngkam mawi lo hman te, tharum thawhna lam hawi leh Court thutlukna kalh zawnga chetna te, President, Judiciary leh ram himna chungchang te leh ram inpumkhatna tichhe thei zawngte an tilang tur a ni lo a, thu belhchian dawl lo leh finfiah lohte an tichhuak tur a ni lo tih a tarlang bawk.

Comments

Popular News (Last 30 Days)

Vawiin-ah HSSLC Exam result