MPF in thawhhona thuthlung bawhchhiatna chu mipui zahlohna ah an ngaih thu an sawi

Mizoram People Forum (MPF) chuan Political Party-te nena an thawhhona thuthlung bawhchhiat chu mipui zahlohna ah an ngaih thu an sawi a, kawngzawh tawh lo turin Political Party te an ngen bawk.

Mizoram People Forum (MPF) hian nimin khan Aizawl Press Club-ah MJA Member te kawmin Thawhhona thuthlung chu Political party hrang hrang aiawhte nen tum eng emawzat sawiho hnua siam a nih thu sawiin, “Political Party President theuh ten hming an ziah hnan a ni. Heti chunga zah lo taka bawhchhiate chu mipui zahlohnaah kan ngai,” tiin thawhhona thuthlung bawhchhiatna a awm nia hriat a nih chuan tute pawhin MPF-ah Report/Complaint thehlut turin an ngen a. Social Media hrang hrangah inthlan chungchanga thubelh chian dawl lo thehdarh leh mimal inbeihna uchuak te ti lo tura mipuite ngenin, “Hetiang a awm a nih chuan thuneitute hnenah hma la tura thlen a ni ang,” an ti bawk.

Thawhhona thuthlung angin inthlan puan hnuah chuan Political party-ten kawngzawh phal tawh loh a nih thu sawiin MPF hruaitute chuan, “Amaherawhchu, tunhnaiah Mizoram hmun thenkhatah thuthlung bawhchhia a kawngzawh thawm hriat tur a awm nual a, pawi kan ti hle,” an ti a. Political Party-ten thuthlung zaha kawngzawh huaihawt tawh loh tur a nih thu an sawi a, MPF hruaitute sawi danin kawngzawh anga sawi theih hi Aizawl bakah Tuidam leh Darlawn tlangdung-ah a awm a. Hei bakah hian House to House Campaign chu inthlanpui hun puan atangin Political Party te nena an thawhhona thuthlung angin kalpui tawh loh tur a nih thu pawh sawiin, House to House Campaign a awm lohna atan District, Constituency leh Local Forum-te an ngen bawk a ni.

MPF hruaitute chuan an Tthuthlung angin mimal leh pawl hminga Candidate te thil dil lo tur leh khawtlang huapa Candidate te intiamtir nei lo turin an ngen a. ECI Model Code of Conduct leh Thawhhona thuthlung in a phal loh angin mipui hnena thil sem te tih loh tur a nih thu sawiin, Party ten Flag tar an uar thara an hriat thu leh tar theih zat bituk aia tam tar lo tura an ngen thu an sawi bawk a. Manifesto leh Candidate-te chanchin chu MPF hriatpuina-a sem tur a nih thu leh Public Meeting leh Street Campaign te chu MPF kaihhruaia neih tur a nih thu an sawi bawk.