Mizoram CEO in inthlan inbuatsaihna puangzar

Chief Electoral Officer (CEO), Mizoram Madhup Vyas IAS chuan nimin khan Aizawl-a ICT Conference Hall-ah thuthar thehdarhtute kawmin Assembly Inthlanpui neih tur atana an inbuatsaihna hrang hrang a tarlang.

Thuthar thehdarhtute a kawmna ah hian CEO Mizoram chuan General Election to Mizoram Legislative Assembly, 2023 atana tul hrang hrangte chu Commission duh dana bawhzui zel a nih thu sawiin, Final Electoral Roll-in a tarlan danin Mizoram pumah mipa voter 4,13,062 awmin, hmeichhe voter 4,39,026 a awm thu a sawi a, Service voter 4,975 awm bawkin Mizoram puma vote nei zat chu 8,57,063 an ni tih a sawi a. Vote thlakna tur Polling Station 1,276 te chu ECI hriattir an nih tawh thu leh DEO tin ten Polling Station mamawh Assured Minimum Facilities (AMF) siam hna kalpuiin, Persons with Disability (PwD) ten Polling Station an thlen theihna turin ruahmanna an siam thu a sawi bawk.

Polling Station 1,276 zinga 765 ah te vote thlak lai webcasting ti tura ruahmanna siam a nih thu CEO chuan sawiin, hei hian Mizorama Polling Station awm zinga 60% a tling phak tih a sawi a. Multi Computer Services, West Bengal-te’n he hna hi an thawk dawn tih a sawi a. EVM/VVPAT Second Randomization thlenga neih a nih tawh thu pawh sawiin, tun thla ni 27 atangin inthlan huna hman tura EVM/VVPAT-te buatsaihna (commissioning) tih tan tur a nih thu leh hemi tur hian Electronic Corporation of India Limited (ECIL) Engineer 48 te rawih an nih thu a sawi bawk a, EVMS/VVPAT-te hi District tina Strong Room-aht e venhimna khauh tak, Armed Security Force leh CCTV hmanga ven reng a nih thu a sawi bawk.

Hei bakah hian CEO chuan Control Unit atana hman tur Ballot paper-te ECI inkaihhruaina angin Government Press-ah chhut fel tawh a nih thu leh District zawng zawngin Oct. 25 khan CEO Office atanga an lak tawh thu pawh a sawi a Postal Ballot hmanga vote thlak thei Category 4 awmin, kum 80 chunglam, Vohbik (PwD) Bbenchmark Disability Certificate nei te, Vote thlak nia Essential Services hrang hrang duty leh inthlan buaipuia duty-te an an nih thu a sawi a. Service voter 4,975 te tan Electronically Transmitted Postal Ballot Management System (ETPBMS) kaltlangin e-Postal Ballot thawn chhuah fel a nih tawh thu a sawi bawk a. Mizorama Assembly Constituency 40-ah In lama vote thlak 'Home Voting' thei turin kum 80 chunglam leh Vohbik, an vaiin mi 2,092 an awm thu pawh a sawi bawk. Venhimna chungchang ah State Police personnel 3,000 bakah Central Armed Police Forces (CAPF) section 450 rawih tura ruahman atangin BSF Company 10, CRPF Company 5 leh SSB Company 5 ten Mizoram an lo thleng tawh tih a sawi bawk.