Serchhip Bial-ah MLA Candidate te tan MPF in Serchhip-ah Common Platform an buatsaih
.jpeg)
Mizoram-a Political Party leh MPF ten Thawhhona Thuthlung an siam anga Serchhip Bazar-a Common Platform neih hi MPF Serchhip District President Rev. Zohmunmawia chuan kaihruaiin Candidate te hi an thusawi hun tur pawh tir vek niin minute 12 theuh thu sawina hun pek an nih hnuah minute 3 theuh an thusawi tlangkhawmna hun pek leh an ni. He huna thu sawi hmasa ber ZPM Candidate Lalduhoma chuan kum 2018 Inthlanpui ah a chenna Bial nena thlantlin a nih thu sawiin, Serchhip Bial-ah Mizoram pum tana Ramlai Malsawmna chang tura kal zawk tura an tih angin lawm takin Serchhip rawn thlang ta a nih thu a sawi a. Eptu MLA anih avangin a bial mipuiten harsatna hrang hrang an lo tawh tawh thin thu leh pawi a tih thu sawiin, Chief Minister ni chunga Bial mipuite lawm tha sut chu a thil chak ber te zinga mi a nih thu a sawi a. “Thawhrim hi hlawhtlinna a ni, sem hi hlawhtlinna alo ni lo tih hi Zoram mipui hriattira a taka lantir kan tum,” a ti bawk.
Independent Candidate Lalawmpuia Renthlei chuan he ram leh hnam a vei thu sawiin, ram siamthat tumin kum 2005 hmalam khan Party Politics-ah a lo inhman ve tawh thu leh a theih loh a ni tih a hriat avangin inhman duhna a nei ta lo tih a sawi a. “Party Politics hi ram siamthat nan a tlinloh avangin Independent atang hian ram siamthatna kawng hi a kaw thui ber a, a remchang ber a, a awlsam ber dawn a ni,” a ti a. Serchhip Bialtu MLA atan Bial chhung mi ngei an that thu leh kum naupang zawk te kan thlantlin a tul tawh thu te pawh a sawi bawk.
Hemi hnu hian Independent Candidate bawk Ramhlun-Edena chuan thu sawiin Lalpa leh a Krista ram lo thleng tur atana Palai hna thawkin Lalpa’n tun hunah hian min hungchhuak a ni, a ti a. He ram leilung hi kan chenna tura Lalpa’n a lo buatsaih lawk a ni tih sawiin, Lalpa’n Zohnahthlak te zawng zawng ama lalram rorelna pakhat hnuaiah min khungkhawm a tum niin a sawi a. Tunah hian ram hrang hrang ami te min hruai khawm mek nia sawiin, Lalpa kalh-a lo che lo hram turin Serchhip Bial chhung mipuite chu a ngen bawk.
BJP Candidate K. Vanlalruati chuan khawvel-a Party member ngah ber leh India ram-a rorellai BJP in amah ringtawka Serchhip Bial enkawl tura an ti chu a tan chuan chawimawina a ni tih a sawi a. Serchhip Bial-ah a ding dawn tih a hriatna ala rei bik lo tih sawiin, In tin pawh a tlawhchhuah hman dawn loh thu leh Bial chhunga VCP te a be vek tih sawiin, BJP chu mirethei te tan a nih thu leh tu Party mah a thliar ngai loh thu a sawi bawk.
MNF Candidate J. Malsawmzuala Vanchhawng chuan ropui bikna a nei lo tih sawiin, Serchhip Bial chhung mi a nih ve avangin Bial mipuite tana theihtawp chhuah tura a inpekna hmachhuan chauha ding a ni tih a sawi a. Serchhip Bial chu Mizoram lailia awm, ziak leh chhiar thiam tamna a ni tih sawiin, kawng tinrengah hmasawnna kawnga Bial dang te entawn tlak ni thei turin remchanna tinreng in a hual thu leh chumi a taka thlen tir tur chuan a theihna zawng zawng a hmang dawn tih a sawi bawk.
INC Candidate R. Vanlaltluanga chuan Serchhip Bial chu a vei thu leh hun rei tak atanga a lo en thin thu sawiin, “Thlantlin ka nih chuan ‘Khawnge kum 5 chhung na reng reng chu theihtawp chhuahin ram leh khawtlang leh midang tan malsawmna turin kan penchhuak teh ang’ tih hi ka rilru luahtu em em a ni,” a ti a. Kan ram, kan hnam leh kan Sakhua humhalh a ngai a ni tih ngaihtuahna seng chunga Vote thlak turin mipuite a chah bawk.
Comments
Post a Comment