Vil uluk zual ngai bik Polling Station 30 awm

Mizoram Legislative Assembly Inthlanpui neih turah Polling Station venhim uluk zual ngai bik 30 a awm.

Thla thar November 7-a Assembly Inthlanpui lo awm turah Mizoram pumah Polling Station 1,276 awmin heng zingah hian Critical Polling Station pakhat leh Vulnerable Polling Station 29 awmin a vaiin Polling Station vil ngun ngai bik hi 30 a awm a. A tirah Polling Station 33 ni mah se enfiahna te neia Sector Officer ten an tlawh hnua an report atangin thenkhat hi chu vil zui ngai lo tura ngaih a ni leh ta a ni. ‘Critical Polling Station’ ti a Election Department in an puan hi Lawngtlai District chhung Tuichawng Assembly bial-a Boraguisury Polling Station a ni e, hetianga an puan chhan chu inthlanpui hnuhnung ber, kum 2018-ah khan Vote za zelah 93.37 tlain heta vote tla za zela 86.73 zet chu Candidate pakhat Kali Kumar Tongchangya chuan a hui vek a. Hetianga vote tla sang leh Candidate-in a hui zawh deuhthaw avang hian vil ngun ngaiah ngaih a ni. 

Vulnerable Polling Station a puan Polling Station 29 te hi Mamit, Aizawl, Kolasib, Champhai leh Lawngtlai District a mi te an ni thung a. Mamit District chhungah hian Hachhek bial-a Polling Station 8, Dampa bial-a Polling Station 3 leh Mamit bial-a Polling Station 2 te chu Vulnerable Polling Station-ah puan a ni a. Kolasib District-ah hian Serlui bial-a Polling Station 6 leh Kolasib bial-ah pakhat a awm bawk a. Aizawl District-a Tuivawl bial-a Polling Station 3, Champhai District-a Champhai South bial leh East Tuipui bial-ah Polling Station pahnih ve ve bakah Lawngtlai District-a Tuichawng bial-a Polling Station pahnih te chu Vulnerable Polling Station-ah hian puan a ni bawk.

Heng vil uluk ngai bik a puan Polling Station-ah te hian Central Armed Police Force (CAPF) mite duty tir an ni dawn a. Vote thlak laiin Webcasting emaw, Video hmanga thlalak vek tur a ni ang a. Thil thleng danglam a awm chuan Video hmanga thla lak vek tur a ni bawk. A theih chinah Micro Observer chu Polling Station chhungah a duty bawk ang.

Tarlan tawh angin Serchhip District-a Polling Station pahnih te pawh vil uluk zual ngai tur hian ruahman a ni a, amaherawh chu Sector Officer ten an zirchian hnuah puan ngai lo tura ngaih a ni leh ta zawk a ni.

Comments

Popular News (Last 30 Days)

LPG man bithliah thar