Sports Person ten ngaihsak an hlawh tawk lo niin sawi

ZPM Party chuan Mizoram-ah Sports-in nasa takin hma a sawn thu sawiin, Sports Person te chuan ngaihsak erawh an hlawh tawk lo niin an sawi.

Aizawl West-II bial-a ZPM Candidate Lalnghinglova Hmar chuan nimin khan Aizawl Press Club-ah thuthar thehdarhtute kawmin Mizoram-ah Sports-in nasa takin hma a sawn thu leh lawmawm an tih thu sawiin, “Hetihlai hian Sports hmasawnna kan tih hi a kai rual tawk lo deuhin kan hria a, infrastructure lamah nasa takin kan thang a, Sports Person-te hian ngaihsak an hlawh tawk lo a, hei hi thlak kan tum,” a ti a. Kum 2019-2023 chhungin Mizoram State Sports Council hnuaiah project lian tham 108 lai thawh a nih laiin akn infiammi te dinhmun erawh ala hniam hle niin a sawi a. “Sports-a hma kan sawn dawn chuan a hmunhma neih that a pawimawh rualin a buaipuitu Sports Association thuamchak hi ZPM chuan a tulin a hria. Tunah hian Sports Association thenkhat chuan National Competition-a an tel dawnin sum leh paiah harsatna an tawk nasa hle a, mimal pawisa pukchawpte pawh an awm thin. Sawrkar tan puih vek sen a ni lo chungin Sports Association-in an dawn tur Sports Promotional Fund hi ZPM a sawrkar chuan ennawn kan tum,” a ti a ni.

The Mizoram Sports Incentive Award Scheme, 2022 chu September 6, 2022 atanga hman tan a nih thu pawh Lalnghinglova Hmar chuan sawiin, “Mizoram State Sports Council hnuaia Recognised Sports Association ni ve thlap si, Sports Incentive Award pek ve loh an awm,” tiin heng Sports Association-te tan hian ZPM chuan ruahmanna a siam dawn thu a sawi a. Sports kan chawisan dawn chuan zirtirtu neih that a pawimawh thu pawh sawiin, “Boxing-ah Coach sang ber AIBA Star 3 kan la nei lo, AIBA Star 2 pakhat leh AIBA Star 1 pakhat kan nei; Football-ah pawh a sang ber Pro License Coach kan la nei lo a, a hnuai chiah A License Coach pawh 2 chiah kan la nei a; Volleyball-ah hian NIS holder 8 chiah kan la nei,” tiin “Kan Coach neihte hi tun aia thuamthat a, training tha zawk leh zirna sang zawk an neih theihna turin ZPM chuan hma a la ang,” a ti a. Sports Association zinga Medal kan dawn theihna tura ngaihte chu tun aia tha zawka enkawl tha an tih thu leh ram leh ram, State leh state inelna lian thamah kan san theihna tura hma an lak dawn thu a sawi bawk.