Serchhip District-a Assembly Bial pathum-ah ZPM leh INC Candidate in Nomination an File ve leh

Mizoram Legislative Assembly Inthlanpui neih tura Serchhip District chhunga Assembly Bial pathum-a INC leh ZPM atanga chuh turte chuan nimin khan Nomination Paper an thehlut a, nimin vek khan BJP Ticket-a ding tur mi pakhat leh Independent-a ding tur mi pahnih ten Nomination paper an thehlut bawk a ni.
Serchhip District chhung Assembly Bial pathum-a ZPM Candidate turte chuan nimin khan Nomination File in Serchhip bialtu MLA nilai leh ZPM Leader Lalduhoma chuan Serchhip Bial-a Returning Officer David Lalthantluanga hnenah Nomination paper a thehlut a, Tukum Bial-a an Candidate tur PC. Vanlalruata chuan RO HD. Lalpekmawia hnenah Nomination File in Hrangturzo Bial-a an Candidate tur Lalmuanpuia Punte chuan he bial a Returning Officer Lalnundika hnenah Nomination a File bawk a ni.


Nomination a File hnua thuthar thehdarhtute zawhna a chhanna ah Serchhip Bial-a ZPM Candidate Lalduhoma chuan Serchhip Bial chu mahni In leh lo awmna ai pawha a lo thlan tawh a nih thu sawiin, Serchhip Bial-ah a ngaihtuahna zawng zawng a awm tih a sawi a. Inthlan hmasa a amah Vote tute leh neutral leh party dang-a mi te pawh Vote leh theuh turin an khawngaihna a dil a. Tuikum Bial-a ZPM Candidate PC. Vanlalruata pawhin Tuikum Bial-ah vawi hnih a din tawh thu leh an tlin loh thu sawiin, tunah chuan Zoram pumah ZPM thli a tleh mek tih a sawi a, tun tumah chuan an Bial-ah pawh ZPM boruak a thain hlawhtlin ngei pawh an inbeisei thu a sawi a. Hrangturzo Bial-a ZPM Candidate Lalmuanpuia Punte chuan Hrangturzo Bial-ah tlin ngei theih an inrin thu a sawi bawk.

Serchhip Bial-a INC Candidate tur mi pathum te pwhin nimin vek khan an Bial theuh a Returning Officer te hnenah Nomination hi an File a, INC atang hian Serchhip Bial-ah R. Vanlaltluanga leh Tuikum Bial-ah TT. Zothansanga te dingin Hrangturzo Bial-ah Lalroenga te an ding dawn a. Nomination an File zawh hnua thuthar thehdarhtu ten an kawmna ah Serchhip Bial-a INC Candidate R. Vanlaltluanga chuan Serchhip Bial chu a pianna Bial a nih thu sawiin, kum 5 chhung kan ram leh Bial tana thawk tak tak turin an rilru a siam tih sawiin, Pathian malsawmna an chan ngei pawh a rin thu leh Serchhip Bial-ah chance nei tha ber nia an inhriat thu leh Bial mipuite nen hmasawnna atana thawhho a beisei thu a sawi bawk. Tuikum Bial-a INC Candidate TT. Zothansanga pawhin Tuikum Bial chu Congress thatna thin a ni tih sawiin, hmun hrang hrang an tlawhna ah Congress chu an ruhrel a lo lian khawp mai tih a sawi a, hei vang hian beiseina sang tak an neih thu leh phur taka an thwhho avangin an tlin a beisei thu a sawi bawk. Hrangturzo Bial-a an Candidate Lalroenga pawhin he Bial-a mipuite chu an Bial tana chak taka hna a thawh theihna tura Vote ngei turin an khawngaihna a dil bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar