Serchhip-ah thisen pek pawimawh zia leh midangte zirtir dan tur chungchang zirho a ni

Nimin khan Serchhip-ah Mizoram State AIDS Control Society (MSACS), District Hospital Blood Bank Serchhip leh Association for Voluntary Blood Donation (AVBD) Serchhip Branch te buatsaihin thisen pek pawimawh zia leh thisen pe tura midangte cho phur theih dan tur chungchang zirhona neih a ni.
Serchhip Kawnpui VC Hall-a ‘Training of Blood Donor Motivation’ hi Serchhip District Medical Superintendent Dr. ZD. Lalmuanawma chuan hmanpuiin mi tlawmngai te inpekna avang leh AVBD member te bakah District Hospital-a thawktu ten thawhhona tha an neih avangin Serchhip Blood Bank chuan mipuite mamawh thisen a nei deuh reng tih sawiin, hemi atana mipui, tlawmngai pawl leh Kohhran hrang hranga thalai pawl te, Zirna In-a kal ten tlawmngaia thisen an pe thin chu lawmawm a tih thu a sawi a. Heng kan inpekna leh tanrualna hian rah tha a chhuah tih sawiin, mi tam tak chu thisen pek kawngah zirtir ngai an la nih thu leh thisen pek dan leh a pawimawh zia chu inzirtir reng a pawimawh thu a sawi a. Chutiang atana hetiang hun buatsaih a ni chu lawmawm a tih thu sawiin, hei hian thisen pek kawngah hmasawnna a thlen ngei a beisei thu leh he huna tel te chu midangte zirtirtu ni zui zel tura a duh thu a sawi a. Pawl hrang hrang ten thisen pek kan uar chhoh mek rualin mimal-a thisen pek pawh kan uar zel a pawimawh thu a sawi bawk.


Nimin-a he training hawnna hun hi Serchhip District Hospital Blood Bank-a Blood Bank Officer Dr. Lalnunhlima Khiangte chuan kaihruaiin Serchhip District Hospital Blood Bank leh AVBD ten thawhona tha tak an neih thu leh an hmalakna hrang hrang te a sawi a. Hemi hnu hian AVBD Serchhip Branch President Zonunsanga Kawlni kaihhruaiin Technical Session hun hmasa hmangin Serchhip Blood Bank Officer Dr. Lalnunhlima Khiangte chuan thisen pek kawnga Serchhip District dinhmun tlangpui sawiin, MSACS atangin Asst. Director (VBD) F. Lalmuanpuii leh AVBD General Hqrs. a General Secretary Lalrinkima ten thupui thlan hrang hrang hmangin thisen pek kawnga hmalak dan tur an sawi a. Chawhnu lamah AVBD Serchhip Branch Secretary T. Biakchamliana kaihhruaiin Technical Session hun hnihna hman leh a ni a, MSACS atangin Lalhmingliani Pachuau, Asst. Director (QM) leh AVBD General Hqrs. a Fin. Secretary Jacob Lalruatpuia ten zirtirna an pe leh bawk a, zawhna leh chhanna hun hman a ni bawk.

He training-ah hian Serchhip Town chhunga Kohhran hrang hrang Thalai pawl aiawhte bakah tlawmngai pawl hrang hrang aiawhte an tel a, training neih zawh hnu hian AVBD General Hqrs. leh AVBD Serchhip Branch hruaitute hian inkawmna an nei zui nghal bawk a ni.

Comments

Popular News (Last 30 Days)

Vawiin-ah HSSLC Exam result