Hnamdang pasal nei Candidate duh loh lantir nan MZP in ‘Hnam humhimna kawngzawh’ nei dawn

Mizo Zirlai Pawl (MZP) General Hqrs. chuan Mizo Hnam humhim zel a nih theih nan leh hnamdang pasal nei Candidate duh loh lantir nan Vawiin hian ‘Hnam humhimna kawngzawh’ buatsaih an tum thu an sawi.

Nimin-a thuchhuah an siamah MZP General Hqrs. chuan kan hma lawk November ni 7, 2023-a Mizoram MLA General Election lo awm turah Hnamdang pasal nei Candidate a dah lo turin Party tinte vawi tam an lo ngen tawh thu sawiin, “MZP ngenna ngaipawimawh a Hnamdang pasal nei Candidate a dahlo party te chungah MZP chuan lawmthu a sawi tak meuh meuh a ni,” an ti a. MZP chuan  December 19, 2022 khan Party tinte hnamdang pasal nei Candidate a dahlo turin ngenna an siam thu leh August ni 21, 2023 khan Party tinte ngenna a thawn nawn leh vek thu sawiin, Party hotute pawh hmuh an nih thu an sawi.

MZP chuan an ngenna zah zo lovin Indian National Congress (INC) chuan Lunglei South Assembly Constituency-ah hnamdang pasal nei, Meriam L. Hrangchal chu Candidate turin an dah tih an thuchhuah ah hian tarlangin, “Ani hi Dipen Zoliana nupui niin, Dipen Zoliana pa chu Niraj Singh a ni a. A nu chu Kawlhmingliani Gorkhali dik tak a ni,” an ti a. “Mizo hnam dan ‘The Mizo Customary Law’ Published by Law & Judicial Department Govt. of Mizoram bung 3:74-na chuan, "...Mizo hmeichhiain hnam dang pasal a neih chuan hnam dang chhungkuaah a luta ngaih a ni" a ti a. MZP chuan Mizo hmeichhia hnam dang neite chu hnam dang chhungkuaah a ngai nghet tlat a. Mizo mipui aiawha ram rorelna sang bera thu turin a pawm thei lo a. Mizo nihna hi Mizorama awm rei tawh avanga in pek chi ah MZP chuan a ngai lo a, Mizo hnam hi thisenah zawk a ni,” an ti a. “Mizo hnam damna turin hetianga hnamdang pasal nei in candidate hi hnawla a, vote lo turin mipuite a ngen takzet a. Hetiang mi candidate a dahtu Congress party pawh MZP chuan a dem takzet bawk,” tiin an thuchhuah ah chuan an tarlang a ni.

Hetihlai hian MPCC President Lalsawta chuan Meriam L. Hrangchal chu an party leh Mizoram tan rohlu (asset) niin an hriat thu nimin khan a sawi a, nimin-a Assembly Inthlanpui neih tura Nomination a File hmaa a chanchinbu mite zawhna chhangin Lalsawta chuan, “Pi Meriam-i hi Congress hian Candidate atan kan duh em em, mi tangkai tur a ni tih kan hria a. Chuvangin, a ni hi Candidate ah kan dah a ni. Lo engto tu an awm ngei ang tih pawh kan ring a. Bial tinah hian Congress hi ding lo vek phei ila chuan tam tak hi an lawmin ka ring a, Party dang tam tak pawh hi an lawm ngei ang. Pi Meriam-i chungchang hi kan party chuan kan ngaihtuah ngun a. Chuvangin, kan party tan chauh ni lovin Mizoram tana rohlu (asset) nia kan hriat avangin kan din tir a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar