Serchhip District-ah EVM Commissioning neiin EVM te hman theih tura peihfel a ni ta

Serchhip District chhung Assembly Bial hrang hranga Assembly Inthlanna neih tura inbuatsaihna kal zelah nimin khan EVM Commissioning neih a ni a, he hunah hian EVM-ah Candidate hrang hrangte hming thunlun niin Vote thlak chhin nghal a ni bawk.
Assembly Inthlanpui neih tura Serchhip District chhung Assembly Bial hrang hranga hman tur EVM te hi tum hnih Randomization nei tawhin a hmasa zawkah EVM te hi Assembly Bial hrang hranga hman turte thliarfel niin a hnuhnung zawkah hian Polling Station hrang hranga hman tur thliar leh a ni a. Heng te hi Strong Room-ah dahluh a nih hnuah nimin khan Political Party leh thuthar thehdarhtute hriatpuina a Strong Room hi hawng lehin Bharat Electronics Limited (BEL) atanga Engineer te kaihhruaina in Commisioning hun hman zui a ni a. Hetah hian EVM chu hman theih tura siamin Candidate te hming leh an chhinchhiahna (Symbol) thunluh a ni.

Serchhip District-a EVM Commissioning neih tur atan hian zing dar 9:00-ah Strong Room te hi hawn niin Serchhip District chhunga Assembly Constituency pathum - 26-Serchhip (ST) AC, 27-Tuikum (ST) AC leh 28-Hrangturzo (ST) AC-a hman tur Electronic Voting Machine (EVM) leh Voter-Verified Paper Audit Trail (VVPAT) khawl te chu lakchhuah a ni a, Assembly Constituency pathum tan hian Commissioning Hall hrang theuh siam niin Candidate leh an chhinchhiahna te dahluh a nih hnuah Party hrang hrang leh Candidate aiawh ten Vote thlak chhinna (mock poll) an nei a, Constituency pakhat zelah EVM pahnih theuhah vote 1000 thlak niin heng vote thlak te hi a dik ngei em tih chhiar leh vek a ni. Tarlan tawh angin Serchhip District chhunga Assembly Constituency pathumah hian Polling Station 88 a awm a. Heng Polling Station-a hman tur EVM leh VVPAT te hi a siamtu company Bharat Electronics Limited (BEL) atanga Engineer pali te kaihhruaina hnuaiah hman theih tur hian ruahman a ni a. Vote thlak nia hman tur EVM leh VVPAT te hi hman mai theih tura endik fel a nih hnuah a hmantlak ngei a ni tih finfiah te chu Strong Room-ah dahluh leh a ni a. Nizan khan Mock Poll leh khawl endik hna hi zofel hman tura ruahman a ni.

Nimin-a Serchhip District chhunga EVM Commissioning hunah hian Serchhip DEO leh Serchhip Bial-a Returning Officer David Lalthantluanga bakah Hrangturzo Bial-a RO Lalnundika leh Tuikum Bial-a RO HD. Lalpekmawia te an tel a. Anni bakah hian ARO leh Political Party aiawh, Media mite leh Official te an tel a. He hun hi Serchhip District-a General Observer V. Sampath IAS pawhin a enpui bawk a ni.