Opposition kan nih avangin a chhe zawngin Bial mipui ten a zar an zo - Lalduhoma

ZPM Leader leh Serchhip Bial-a ZPM Candidate Lalduhoma chuan MLA Term kal mekah Opposition a nih avangin a Bial mipui ten a chhe zawngin a zar an zo nia sawiin, a hausakna pung chak lutuk nia sawi chu a Inhmun a hralh then vang a nih thu a sawi bawk.

Serchhip Bialtu MLA leh Assembly Inthlanpui lo awm tura Serchhip Bial-a ZPM Candidate Lalduhoma hian Inrinni khan Serchhip Press Club-ah thuthar thehdarhtute kawmin Serchhip Bial chu Opposition bial kan nih avanga kan nih tur ang kan nih theihloh, kan dawn tur ang kan dawn theihloh tam tak a awm tih sawiin, Opposition kan nih avangin a chhe zawngin a bial mipuiten a zar an zo chu pawi a tih thu leh ZPM a lo sawrkar a nih chuan Chief Minister Bial a nih dawn avangin nasa takin hna an thawk dawn tih a sawi a. Serchhip Kawlri tlang-a Heritage Centre siam tura hma an lakna ah harsatna an tawh thu sawiin, Serchhip Heritage Society leh MZU tangkawpa Project siam-a NEC-a thehluh a nih dan te, Tourism Department in ziak meuhva NEC-a an lungawiloh thu an thlen thute a sawi a. Hemi hnu hian Project Investigator tur inruata hmalak an tum laiin PI kutah hian engmah hlan a nih tak chuan loh thu a sawi a. Serchhip Heritage Society emaw, Project Investigator emaw in thawk lo a midang thawh tir tumna a awm tlak avangin Serchhip DC chu Implementing Agency a tan sak tura an ngen angin August ni 1, 2023 khan Serchhip DC chu Implimenting Agency ni tura pawm a nih hnu ah an paltlang tak hram thu a sawi a. he Heritage Centre hi a puitlin hunah chuan Serchhip Bial mai ni lovin Zoram pum tan Centre pawimawh tak ala ni dawn tih a sawi bawk.

ZPM Leader chuan Inthlan laiin Bialtu MLA an nih anga an tihtur leh Sawrkarna an chang huna an tih tur an sawi thin tih pawh thuthar thehdarhtute a kawmna ah hian sawiin, inthlan laia an thusawi tam tak zingah ‘Kan sawrkar chuan’ tih leh ‘Kan sawrkar hunah chuan’ tia sawi a awm thu a sawi a, “Kan sawrkar huna kan tihtur kan lo sawi thin te tuna ti tur anga intiam anga inpuh luihna a tam em em,” tiiin mipuite pawhin an hriatthiam pui a duh tih a sawi a. Serchhip bialtu MLA a nih chhunga a hmalakna hrang hrangte pawh a sawi bawk a ni.

Serchhip Bialtu MLA nilai Lalduhoma chuan a Bial ngaihsak lo leh chhuahsan tum anga mi thenkhat ten an sawi chungchang ah Serchhip Bial chu a awmna Bial aia a thlan tawh a nih thu sawiin, chhuahsan tumna a neih loh thu a sawi a. Rampum-a sawrkarna la phak dinhmuna an awm theih nan Bial dang-ah a zinkual a ngaih thin thu leh Serchhip Bial-a an Party hruaitute leh mipuite chu a rintawk thu a sawi bawk a ni.

MLA Inthlanna neih tura Affidavit a theh-luh-ah a hausakna pung chungchang zawhna chhangin ZPM Leader Lalduhoma chuan engmah neih belh a neih loh thu leh a huan, Periodical Patta pakhat hnuaia awm thin chu pali-ah a then thu leh Chawlhhmun-a a In hmun, mi hrang hrang ram an leikhawm chu hmun 8-ah a then thu leh pathum (3) chu a hralh thu a sawi a, “Chu pathum ka hralhna man chu a tlem vak bik lo a ni,” tiin Inthlan hun atana a hman tura a tih ve a nih thu a sawi a. “Huan leh In hmun ka neih sa hi ka nei te tual tual a, ka nei tlem tual tual zawk a ni,” a ti.

Serchhip Bial-a a khingpui turte chungchang zawhna pawh chhangin Lalduhoma chuan INC atanga Candidate chu tunhma lamah party pakhat a lo awm ho tawh thin an nih thu leh mi tha tak a nih thu a sawi a, MNF atanga Candidate pawh mi tam takin ZPM mi ni tur awm taka an ngaih a nih thu sawiin, mi tha tak ve ve an nih thu a sawi a. Amaherawh chu tun dinhmun ah chuan an awmna hmun a fuh tawk rih lo nia a hriat thu sawiin, Pathian leh mipuite zarah hnehna an chan leh ngei an beisei thu a sawi bawk.

Comments

  1. Pathian leh Serchhip bial mipui fing leh fel tak takte zarah CM chhuanawm bik i nih theih nan duhsak malsawmna ka hlan e.

    ReplyDelete

Post a Comment

Popular News (Last 30 Days)

Bawngchawm tlang khualbuk rawktu nia hriat mi 2 man