Serchhip District chhunga Bial 3 chuh turin nimin tlai thlengin mi 13 in Nomination an File tawh

Mizoram Legislative Assembly Inthlanpui neih turah Serchhip District chhunga Assembly Bial pathum chuh turin nimin tlai thleng khan mi 13 ten Nomination an File tawh a. Inthlanpui nei tura inbuatsaihna kawngah tun thlengin harsatna an la neih loh thu District Election Officer (DEO) chuan a sawi bawk.

Serchhip District Election Officer (DEO) leh District Bawrhsap David Lalthantluanga chuan Assembly Inthlanpui nei tura inbuatsaihna kal mekah nimin khan a tum hnihna atan Serchhip DC Meeting Hall-ah thuthar thehdarhtute kawmin MLA General Election lo awm tur atana inbuatsaihna an kalpui dan hrang hrang a hrilh a. Serchhip DEO chuan October ni 13, 2023 atangin Inthlan chuh tumte tan Nomination Paper thehluhna hun hawn a nih thu sawiin, nimin tlai dar 3:00 thleng khan mi 13 ten Nomination an File tawh thu a sawi a. Heng te hi 26-Serchhip (ST) AC-ah R.Vanlaltluanga (INC), J. Malsawmzuala Vanchhawng (MNF), Lalduhoma (ZPM) leh Lalawmpuia Renthlei (Independent) te niin 27-Tuikum (ST) AC-ah TT. Zothansanga (INC), Er. Lalrinawma (MNF), PC. Vanlalruata (ZPM) leh C. Lalrinmawii (Independent) te an ni a. 28-Hrangturzo (ST) AC-ah Lalmalsawma (BJP), Lalroenga (INC), Lalremruata Chhangte (MNF), Lalmuanpuia Punte (ZPM) leh Zaichhawna Hlawndo (Independent) te an ni a. Nomination thehluh hun hi Vawiin tlai dar 3:00 thleng a ni dawn a, Nomination File te tan hian October 23, 2023 thlengin inhnuhdawhna hun hawn leh a ni dawn bawk a ni.

Serchhip District Election Officer chuan Inthlanpui atana inbuatsaihna kal mekah harsatna an la nei lo nia an hriat thu sawiin, thawktu hrang hrang te leh MPF te nen pawh thawhhona tha tak an neih thu a sawi a, hei bakah hian Political Party te pawhin Dan an zawm tha viau nia an hriat thu leh tun thlengin Model Code of Conducts (MCC) bawhchhiatna report dawn an la neih loh thu a sawi bawk a ni.

Serchhip District tana Election Observer pathum, General, Expenditure leh Police Observer te chu Election Commission of India in a ruat fel tawh thu leh Expenditure Observer Umesh Chandrakant Phade IRS chuan tun thla ni 13 khan Serchhip rawn thlengin nizan khan a vawi hnihna atan rawn thleng leh tura beisei a nih thu DEO chuan a sawi a. General Observer V. Sampath IAS leh Police Observer Meren Jamir IPS te pawh Serchhip pana rawn kalin nimin tlai lam khan Serchhip rawn thleng hman tura beisei an nih thu a sawi bawk a ni.

Inthlanpui atana hma an lakna hrang hrang te District Election Officer chuan sawiin, First Randomization of Polling Parties neih ni tawhin Presiding Officer 107, Assistant Presiding Officer 107 leh Polling Officer 214 ruatin Training vawi khat neih a nih tawh thu leh tun thla ni 30 leh 31-ah a vawi hnihna atan neih leh a nih dawn thu a sawi a. Candidate te sum hman dan ngun taka vil tura din Flying Squad Team, Static Surveillance Team, Video Surveillance Team, Video Viewing Teams leh MCMC Team ten an hna thawkin Candidate hming pelut tawh te tan Shadow Account Register hawnsak vek an nih thu a sawi bakah SVEEP hnuaiah kawng hrang hranga hmalak a nih thu te a sawi bawk a. Sector Officer ten tum hnih an Sector tlawh tawhin Critical Polling Station tura lo rawt tawh Sailulak leh Lungkawlh Polling Station te chu an Report atangin Critical Polling Station ngai lo tura ngaih a nih thu a sawi bawk.

Inthlanna fel fai, thianghlim leh mi zawng zawng huap a awm theih nan Serchhip District a thuthar lakhawmtute zawng zawng thawhhopuiah Bawrhsap chuan sawmin, Serchhip District mipui ten Election chungchanga hriattur tul te an hriat theih nan ECI duhdan angin Press Briefing hi kartin neih tum a nih thu a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man