Kan innghahna chu Pathian a ni - Lalsawta

Mizoram Pradesh Congress Committee (MPCC) President Lalsawta chuan kumin MLA inthlan chu Thlarau Indona nia sawiin, “He inthlana kan innghahna chu Pathian a ni,” a ti.

Inrinni zing-a Aizawl West-III huamchhung Maubawk Dawrkawn-a Vantlang inkhawm buatsaihah MPCC President Lalsawta chuan India ram dinhmun sawiin, ram pawn atanga beihna ah a chhunga mite kan tanrual theih laiin, a chhung atanga beihna erawh kehchhiatna a ni tih sawiin, “Hetianga kehchhe vek thei dinhmuna kan din chhan chu BJP in Hindu Lalram din an tum vang a ni,” a ti a. MNF in ‘inneihna hi man inpek hian a tawk mai e’ tiin ruahmanna an siam tlat mai chu Kohhran dan thianghlim pawisak lohna a nih thu sawiin, “Hei hi BJP an mawngzawm nghehzia lantirtu leh UCC an duh zia lantirtu a ni,” a ti bawk.

MPCC President chuan kumina an party Manifesto-a an tarlan angin, Cancer leh natna harsa zual bik vei inenkawlna la mekte tanpui nan kumtin budget-ah cheng vbc. 5 an dah tur thu sawiin, “Mizoram Budget kan hriatchian avangin hei hi kan ti thei a, a kawng kan hria a ni,” a ti a. Hei bakah hian kum upa ten Tar chawmna thlatin Rs. 300 leh Rs. 800 an dawn thin chu thlatin Rs. 2000 in pek an ni anga; Rualbanlo leh Hmeithaite tan National Social Assistance Programme hnuaia thlatin Rs. 400 an dawn chu Rs. 2000 an ni ang tih a sawi bawk.