BJP in SEDP kalpui dan chhui an tum tih sawi

BJP National President Jagat Prakash Nadda chuan Mizoram-ah BJP telna sawrkar a piang a nih chuan MNF sawrkarin SEDP a kalpui dan chhui chiang turin Special Investigation Team din a ni ang, a ti.

Nimin-a ‘BJP Mizoram Pradesh Vision Document’ tlangzarhna Aizawl-a Hotel Regency-a neih ah BJP National President chuan BJP ten Vision Document an tlangzarh chu party dang Manifesto tlangzarh anga lehkhapuan satliah mai a ni lo tih sawiin, Mizoram chu hmarchhak dangte ruala Prime Minister kaihhruaina a zara thang chho mek a ni, a ti a. Mizoram-ah BJP in sawrkarna a chang a nih chuan Zoram Medical College pawh Regional Level a hlangkai tura intiam in, Mizoram tan hmasawnna nasa tak a thlen dawn thu a sawi bawk.

BJP Mizoram Pradesh in nimin-a Manifesto an tlangzarh takah hian ‘SEDP a eirukna enthlithlai turin Special Investigation Team siam’ tih chu telin ‘Tun sawrkar pawisa mismanagement chungchanga White Paper tihchhuah’ leh ‘Assam leh Mizoram inkara ramri buaina tihfel’ tih te chu a tel a. Heng bakah hian Damdawi hman-sualna tireh tura beihpui 'Operation Drug Free Mizo-ram' kalpui te; Hmeichhiate tana sawrkar hna-a 33% reservation siam te; Cheng vbc. 500 hmanga Mizoram Health Care Fund siam te; Sawrkar sikul siamthatna tura cheng vbc. 250 dah leh Regional Institute of Medical Science-ah ZMC leh te a tel a. Heng bakah hian Chhungkaw tina Lotus Family ID card pek a, chunga zirlaite chu cheng nuai 10 thleng Short Term Free Loan pek, kuthnathawk pawl nei lote Short Term Loan cheng nuai 1 thleng pek, chhung tin tana sawrkar hna leh mimal hna hmuh theihna siam te telin Rural leh Urban tana Infrastructure Development Mission din leh hemi atana sum ruahman te pawh a tel bawk a ni.