Nimin-ah Nomination paper thehlut mi 2 awmin Serchhip District-ah mi 15 in Nomination an File ta
.jpeg)
Mizoram Legislative Assembly Inthlanpui neih tur atana chuh tum te tana hming pekluh hun hnuhnung ber nimin-ah khan Serchhip District chhunga Assembly Bial pathum (3) zingah 26-Serchhip (ST) AC chuh tura hming pelut mi pahnih awmin 27-Tuikum (ST) AC leh 28-Hrangturzo (ST) AC chuh tura hming pelut erawh an awm lo a. Nimin chawhma lam khan Serchhip Bial-a Independent Candidate ni turin RamhlunEdena chuan Returning Officer David Lalthantluanga hnenah Nomination Paper a thehlut a. Nomination Paper a thehluh hnua Nomination Papet a thehluh chhan thuthar thehdarhtute zawhna a chhanna ah, India ram Danpui ah lalram pahnih a awm thu sawiin, chu chu malsawmna leh anchhia a nih thu a sawi a. Chumi ah chuan khawvel mifingte ten an Pathian ram an tun dinna, Secular Democratic Republic leh a dang chu Pathian lalram Lal Isua’n min zirtir a awm thu leh chu Pathian Lalram lut chuan Vote thlak a inthlan lam anih loh rualin Pathian lalram a lut tur leh a malsawmna chang tur chuan Nomination file loh chuan a luh theih loh avanga Nomination hi File a nih thu a sawi a ni.
Nimin chawhnu lam khan Serchhip Bial-a BJP Candidate tur K. Vanlalruati pawhin Nomination Paper thehlutin Nomination a thehluh hnua LENKAWL zawhna chhangin Serchhip Bial-ah potential tam tak a awm thu leh Resource pawh a that thu a sawi a, Mizoram ram laili a nih angin mipuite pawhin changkanna kawng an zawh tur tam tak a awm thu leh Mizoram-ah chuan Bial chei chakawm ber a nih thu a sawi a. Mirethei te tana ding thin, Party party pawh sawi lova mirethei khaichhuah tumtu BJP-ah theihtawp chhuahpui turin Serchhip Bial mipuite a sawm bawk.
Heti hian thla thar November 7-a Mizo-ram Assembly Inthlanpui lo awm turah Serchhip District chhunga Assembly Bial pathum (3) chuh tura Nomination Paper thehlut chu mi 15 awmin INC, MNF leh ZPM te chuan Bial pathum ah hian Candidate an nei vek a, BJP in Bial pahnih ah Candidate neiin Independent-a ding tur mi 4 lai an awm bawk a ni.
26-Serchhip (ST) AC-ah Inthlan chuh tura hming pelut tam berin mi 6 an awm a, chung te chu K. Vanlalruati (BJP), R. Vanlaltluanga (INC), J. Malsawmzuala Vanchhawng (MNF), Lalduhoma (ZPM) leh Independent-a ding tur Lalawmpuia Renthlei leh RamhlunEdena te an ni a. 27-Tuikum (ST) AC-ah mi 4 in Nomination File in TT. Zothansanga (INC), Er. Lalrinawma (MNF) leh PC. Vanlalruata (ZPM) bakah Independent-a ding tur C. Lalrinmawii te an ni. 28-Hrangturzo (ST) AC-ah mi 5 in Nomination File in heng te hi Lalmalsawma (BJP), Lalroenga (INC), Lalrem-ruata Chhangte (MNF), Lalmuanpuia Punte (ZPM) leh Independent-a ding tur Zaichhawna Hlawndo te an ni bawk.
Election Commission of India in ruahmanna a lo siam tawh angin heng inthlan chuh tuma Nomination Paper thehlut te Nomination Paper hi Vawiin chawhma dar 11:00 atang hian Assembly Constituency tina Returning Officer te kaihhruaina hnuaiah enfiah a ni dawn a. Nomination Paper pawm te tan hian karleh Thawhtanni, Oct. 23, 2023 chawhnu dar 3:00 thlengin inhnuhdawh theihna hun hawn leh a ni dawn bawk a ni.
Assembly Inthlanpui chuh tura Nomination Paper leh Affidavit thehluh te hi mipuite en theih tura phochhuah nghal zel a ni a, Returning Officer te Office bakah Know Your Candidate Mobile Application kaltlangin en theih a ni bawk a ni.
Comments
Post a Comment