SVEEP State Icon te kawm

Chief Electoral Officer (CEO) Madhup Vyas IAS chuan General Election to Mizoram Legislative Assembly, 2023 atana SVEEP State Icon-te chu nimin khan a Pisa-ah a kawm.

He inkawmna ah hian Mizoram CEO chuan SVEEP State Icon-te chu inthlan kaihhnawih hriattur pawimawhte leh vote thlak tura khua leh tuite zirtir leh hrilhhriat kawnga mawhphurhna hlen tura beisei an nih thu a sawi a. Mizoram chu ziak leh chhiar thiam tamna leh Civil society chak tak awmna State a nih thu sawiin, kan zavaia tanrualna hmangin vote tlak thatna ber State kan siam thei a ni, a ti a. Electoral Roll-ah thalai vote nei thar 50,751 an inziahluh thu sawiin, thalaite'n vote thlak an ngaihpawimawh ngei theih nana tanlak a tul thu a sawi a. Kalkhawmte chu CEO Office nena thawkho an nih tawh thu hrilhin, mawh-phurhnate nuam ti taka hlen turin a chah a ni.

CEO hova Meeting-ah hian vote thlak tam lam Voter Turnout ti sang tura hmalakho dan turte sawiho niin, inthlan hmasa lama vote tlak dante bihchian niin a aia tam vote a tlak theih nana tanlak tlan a tul thu tarlan a ni a. Media platform hrang hrang hman tangkai a tul thu leh mipuite zirtirna thahnemngai taka kalpui a pawi-mawh zual thu tarlan a ni bawk a. Heng bakah hian Media Cell, CEO Office leh State Level MCMC kaltlanga hmalak dante ngaihthlak a ni bawk.

Meeting-ah hian SVEEP State Icon zingah S.Malsawmtluanga (Mama, Footballer), DJ. Lalvenhimi (Dj-i, Singer), Teresa Rodingliani (Tess Pachuau, IG Personality), Zorinsanga Sailo (Zorina, Singer) leh Angelina VL. Hriatpuii (Angelina Paul, Media Personality) te an tel a. Anni bakah hian State SVEEP Icon-ah Zothankimi (Kimkimi, Model), VL. Hmangaihdawngkima (Kimkima, Singer), Zorinpuii Hlawndo (Tetei, ZONET TV Anchor) leh Lalbuatsaiha (Asst. Prof., Govt. J. Thankima College, State PwD Icon) te an tel a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar